BQO-da Kórisý kúni jáne Naýryz meıramyna oraı jınalýǵa tyıym salyndy
BQO Sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń Óńirlik kommýnıkatsııalar qyzmeti alańynda málim etkenindeı, 14 naýryz – Kórisý jáne Naýryz merekelerine oraı jergilikti atqarýshy organdar baǵdarlamalar daıyndaýda.
Nurlybek Mustaevtyń sózine qaraǵanda, bul rette adamdardyń kóp jınalmaýy qajettigi, sanıtarlyq-epıdemıologııalyq talaptardyń saqtalýy mindetti túrde eskeriledi. Іs-sharany uıymdastyrýshylar azyq-túlik taǵamdaryn daıyndamaýy jáne taratpaýy tıis. Sondaı-aq áleýmettik araqashyqtyq, betperde rejımi saqtalady.
«Jańa jylǵy meıramnan keıin koronavırýsqa shaldyǵý kórsetkishi kúrt kóbeıip, oblys «qyzyl» aımaqqa kirgendikten, sharalardy qatańdatýǵa májbúr boldyq. Naýryz meıramynan keıin osyndaı kúıge tap bolmas úshin turǵyndar qonaqtyq sekildi kópshilik is-sharalardan bas tartqany durys», - dedi N.Mustaev.
Onyń aıtýynsha, jyl basynan beri óńirde 4446 adam koronavırýs juqtyrdy. Al 1 naýryzdan beri 659 adamnyń indetpen aýyrǵany anyqtaldy. Olarmen qarym-qatynasta bolǵan 1524 adam medıtsınalyq baqylaýǵa alyndy.
Syrqattanǵandardyń 226-sy nemese 34,2 paıyzy buryn aýyrǵandarmen baılanysta bolsa, 162-si nemese 24,5 paıyzy saýda úıleri, bazarlar, medıtsına uıymdary sııaqty adam kóp jınalatyn oryndarda, 185-i nemese 28 paıyzy qoǵamdyq kólikte, 65-i nemese 9,8 paıyzy toı-sadaqalarǵa qatysqan kezde juqtyrǵan.
Oblystyq Densaýlyq saqtaý basqarmasy basshysynyń mindetin atqarýshy Arman Qalıbekovtiń naqtylaýynsha, qazirgi kezde ınfektsııalyq aýrýhanalarda naýqastyń tolýy 50 paıyzǵa jýyqtaǵan. Bul – respýblıkadaǵy joǵary kórsetkishterdiń biri. Oǵan qosa ambýlatorlyq em alyp jatqandar barshylyq. 8 naýryz meıramynan keıin aýrýshańdyqtyń óskeni baıqalady. Sońǵy táýlikte ǵana 71 adam koronavırýs juqtyrdy.
«Árkim óz densaýlyǵyna jaýapty bolýy kerek. Sondyqtan aldaǵy meıramdar kezinde is-sharalardy beınebaılanys, onlaın arqyly ótkizýdi usynamyz», - dedi A.Qalıbekov.
