BQO-da kompanııa mal ólekseleri men qaldyqtaryn aýyl mańyna tógip jatyr
ORAL. KAZINFORM – Batys Qazaqstan oblysy Báıterek aýdanynda «KAZMEAT Aqjaıyq» kompanııasynyń mal ólekseleri men soıǵannan keıingi qaldyqtaryn ıAnaıkın aýyly mańyna tógip jatqany jóninde áleýmettik jelide beınejazba tarady.
Qoǵam belsendisi Almagúl Iqsanovanyń Instagram áleýmettik jelisinde jarııalaǵanyndaı, maldyń bas-terisi, súıekteri, ishek-qarny, ólekseleri eki úlken shuńqyrǵa tastalǵan. Osyǵan oraı aýyl turǵyndary jınalyp, óz shaǵym-tilekterin bildirdi.
ıAnaıkın aýylynyń turǵyny Ermuhan Ǵubashevtiń Kazinform tilshisine málim etkenindeı, munyń bári — «KAZMEAT Aqjaıyq» kompanııasynyń qasaphanasynan shyqqan qaldyqtar. Mal ólekseleri de bar, onyń neden ólgeni belgisiz.
— Bul másele boıynsha aýyl ákimi Sáýle Aqqaıyrovaǵa jolyqtyq. Ol kompanııa mal molasyn salyp bitkenshe, kóktem shyqqansha, ruqsatymdy berdim deıdi. «KAZMEAT Aqjaıyq» kompanııasynyń dırektoryn da shaqyrtyp, eskerttik. Olaı bolsa mal molasyn salyp, órteıtin qurylǵylaryn qoıǵansha, mal soıýdy toqtatsyn degen talap qoıdyq. Bul talabymyz oryndalmady, — dedi E.Ǵubashev.
Taǵy bir turǵyn Zamır Ǵumarovtyń naqtylaýynsha, mal qaldyqtary tógilip jatqan jer aýyldan shamamen eki shaqyrymdaı jerde.
— Sasyq ıisten demalý múmkin emes. Erteń qar erip, kóktem kelgende ne bolmaq, aýrý taramaı ma? — deıdi Z.Ǵumarov.
ıAnaıkın aýyldyq okrýginiń ákimi Sáýle Aqqaıyrovanyń túsindirýinshe, mal molasy 0,04 gektar aýmaqta ornalasqan, qorshaýy bar. Qaldyqtardy tógý úshin «KAZMEAT Aqjaıyq» JShS kelisimmen mal molasyn 2025 jyldan ýaqytsha paıdalanyp keledi. Óıtkeni keshenniń krematorııi jumysyn bıylǵy kóktemde bastaıdy.
— Mal molasy tolǵannan keıin kompanııa qańtar aıynda soǵan jaqyn jerden kelispesten jańa shuńqyr qazǵan. Ekinshi ashyq shuńqyrdy aqpan aıynda kórgennen keıin keshen basqarýshysyn shaqyryp, mal molasyn 1 naýryzǵa deıin tıisti retke keltirýdi talap ettim. Biraq okrýg turǵyndarynyń ótinishinen keıin maldárigerlik ınspektsııa men sanıtarııalyq-epıdemıologııalyq stantsııaǵa shaǵym joldanatyn bolady, — dedi S. Aqqaıyrova.
Báıterek aýdany ákimdiginen túsken málimetke qaraǵanda, tekserý bitkennen keıin jaýapty qyzmetkerlerdi ákimshilik jaýapkershilikke tartý máselesi qaralady.
— «KAZMEAT Aqjaıyq» JShS atalǵan mal molasyn bıylǵy 1 naýryzǵa deıin joıýǵa mindettendi. Kompanııanyń mal molasy úshin jer telimi belgilendi. Ol mal molasyn ustaý talaptaryna saı bolýy tıis. Jaǵdaı baqylaýda, — delingen resmı jaýapta.
BQO boıynsha ekologııa departamentiniń basshysy Murat Ermekqalıev atalmysh másele boıynsha ákimshilik sıpattaǵy shara qoldanylatynyn jetkizdi.
Eske sala keteıik, budan buryn BQO-da ken ornynda gaz alaýy jaǵylyp jatyr, budan taıaýdaǵy aýylǵa keler qaýip bar ma, sony jazǵan edik.