BQO-da kommýnaldyq salaǵa qajetti tehnıkalar lızıngke satyp alyndy
ORAL. KAZINFORM — Jańaqala aýdanynda kommýnaldyq salaǵa qajetti arnaıy tehnıkalar paıdalanýǵa berildi. Saltanatty rásimge aımaq basshysy Narıman Tóreǵalıev qatysyp, kásiporyn jumysshylaryna kólik kiltterin tabys etti.
Aralas jol jáne vakýýmdyq mashınalar, búıirlik júktemesi bar qoqys tasyǵysh, barlyǵy úsh tehnıka «Ónerkásipti damytý qory» AQ arqyly lızıngke satyp alyndy.
Bul — óńir aýdandaryndaǵy alǵashqy tájirıbe.
Oblys ákimi Memleket basshysy Qasym-Jomart Toqaevtyń tapsyrmasyna sáıkes kommýnaldyq salany jańǵyrtý, tehnıkalyq múmkindigin arttyrý jáne halyqqa kórsetiletin qyzmet sapasyn jaqsartý baǵytynda naqty jumystar atqarylyp jatqanyn atap ótti.
— Kúndelikti ómirimizdi kommýnaldyq sala qyzmetkerleriniń eńbeginsiz elestetý múmkin emes. Búgin kásiporynǵa jańa tehnıkalardyń tabystalýy — eldi mekenderdiń tazalyǵy men kórkeıýi úshin jasalǵan naqty qoldaýdyń kórinisi. Kommýnaldyq tehnıkalardy lızıngke satyp alý boıynsha bastamany basqa aýdandarǵa da taratýymyz kerek, — dedi Narıman Tóreǵalıev.
