BQO-da kommýnaldyq qyzmetterge 58 arnaıy tehnıkanyń kilti tabystaldy
ORAL. KAZINFORM — BQO ákimi Narıman Tóreǵalıev oblys boıynsha kommýnaldyq mekeme qyzmetkerlerine 58 arnaıy tehnıkanyń kiltin tabystady.
Atap aıtqanda, kommýnaldyq qyzmet salasyna qajet tehnıkalardyń túrleri – avtokran, kran-manıpýlıator, kóshpeli elektrotehnıkalyq laboratorııa kóligi, avtogıdrokótergish, avtobýs jáne taǵy basqalary bar. Arnaıy tehnıkanyń 20-sy oblys aýdandaryna jiberilse, qalǵandary «Batys Qazaqstan aımaqtyq elektr jelilik kompanııasy» JShS-niń enshisinde qalmaq.
«Memleket basshysynyń elektr jelilerin jańǵyrtý boıynsha alǵa qoıǵan mindetterin oryndaý aıasynda «Batys Qazaqstan aımaqtyq elektr jelilik kompanııasy» úshin 58 birlik tehnıka satyp alyndy. Búginde kommýnaldyq qyzmet salasyn damytý úshin memleket kommýnaldyq sharýashylyqtar men kásiporyndardyń materıaldyq-tehnıkalyq bazasyn nyǵaıtýǵa barynsha kóńil bólip jatyr. Búginde tehnıkalary jańartylýda. Bul baǵytqa jergilikti bıýdjetten 1,9 mlrd teńge qarjy bólindi. Turǵyn úı-kommýnaldyq sharýashylyq qyzmeti – óńir turǵyndary úshin eń mańyzdy jáne qajetti salalardyń biri. Kúndelikti tutynyp jatqan elektr energııasy, aýyz sý, káriz jelilerin paıdalaný jáne basqa da ıgilikter osy sala qyzmetkerleriniń arqasynda múmkin bolyp otyr», - dedi óńir basshysy Narıman Tóreǵalıev.
Jalpy oblys boıynsha jyldan-jylǵa medıtsına, polıtsııa, kommýnaldyq mekemeler, taǵy da basqa salalarǵa berilgen arnaıy tehnıkalardyń sany artyp keledi. Máselen, osydan birer apta buryn orman sharýashylyǵy 32 jańa traktormen tolyqsa, ótken jyly medıtsına salasyna 81 avtokólik, Tótenshe jaǵdaı departamentine 46, Polıtsııa departamentine 149 (bıyl 17 birlik) tehnıka satyp alyndy.
