BQO-da kommýnaldyq ınfraqurylymdy jańǵyrtýǵa 113,7 mlrd teńge bólindi
ASTANA. KAZINFORM – Premer-mınıstrdiń orynbasary Qanat Bozymbaev Batys Qazaqstan oblysyna jumys sapary barysynda «Energetıkalyq jáne kommýnaldyq sektorlardy jańǵyrtý» ulttyq jobasy aıasynda júzege asyrylyp jatqan nysandardyń qurylys qarqynymen tanysty.
Óńirde jylýmen qamtý, elektr jelileri, sýmen jabdyqtaý jáne sý burý júıelerin jańǵyrtý boıynsha birqatar iri joba iske asyrylyp jatyr.
Vıtse-premer aldymen Oral qalasyn jylý jáne ystyq sýmen qamtamasyz etetin JaıyqTeploEnergo kásipornynyń jumysymen tanysty.
Qazirgi ýaqytta kásiporyn Energetıka mınıstrliginiń baǵalaýynsha «qyzyl aımaqta» tur.
– 2029 jylǵa deıin júrgiziletin jańǵyrtý jumystarynyń nátıjesinde tozý deńgeıin 83 paıyzdan 60 paıyzǵa deıin tómendetip, nysandy «sary aımaqqa» shyǵarý josparlanyp otyr, – delingen habarlamada.
Sondaı-aq uzyndyǵy 1,8 shaqyrym bolatyn №7 jylý magıstralin qaıta jańartý jumystary jalǵasýda. Tozý deńgeıi 65 paıyzdy quraıtyn bul nysan 24 bıýdjettik mekeme men 130 turǵyn úıdi jylýmen qamtamasyz etedi.
Qanat Bozymbaev qurylys-montajdaý jumystarynyń sapasyn qatań baqylaýdy tapsyrdy.
Odan keıin vıtse-premer Oral qalasynyń Zachagan kentindegi №29 káriz-sorǵy stansasynyń qurylys barysyn tekserdi.
Qazirgi tańda munda jumystardyń 40 paıyzy oryndalǵan.
Jobanyń quny – 1,7 mlrd teńge.
– Jańǵyrtý aıaqtalǵannan keıin stansa táýligine 14 700 tekshe metrge deıin sarqyndy sýdy aıdaı alady. Bul jańa abonentterdi qosýǵa jáne kommýnaldyq ınfraqurylymdy tıimdi basqarýǵa múmkindik beredi, – dep habarlady jaýapty mamandar.
Sapar barysynda Batys Qazaqstan aımaqtyq elektr jelilik kompanııasy nysandary da nazardan tys qalǵan joq.
Munda jalpy uzyndyǵy 138 shaqyrym elektr jelisin jańǵyrtýǵa baǵyttalǵan úsh kezeńdi joba iske asyrylýda.
– Júrgizilip jatqan jumystardyń nátıjesinde oblystaǵy elektr jelileriniń tozý deńgeıi 82 paıyzdan 75,4 paıyzǵa deıin tómendedi, – dep atap ótti Qanat Bozymbaev.
Vıtse-premer otandyq óndirýshilerdi qoldaý máselesine de toqtaldy.
Jobalarda qazaqstandyq temirbeton tirekteri, kabeldik-ótkizgish ónimder, metall konstrýktsııalar, transformatorlyq qosalqy stansalar men polıetılen qubyrlary paıdalanylyp jatyr.
Keıbir nysandarda qazaqstandyq qamtý úlesi 80–99 paıyzǵa deıin jetedi.
29 mamyrdaǵy málimet boıynsha EKSJ elektrondyq platformasynda Batys Qazaqstan oblysy boıynsha jalpy quny 113,7 mlrd teńgeni quraıtyn 38 joba tirkelgen.
Olardyń ishinde jalpy quny 21,9 mlrd teńge bolatyn 10 pılottyq joba belsendi iske asyrylý kezeńinde tur.
Aıta keteıik, Oralda Eýrazııalyq ındýstrııalyq-logıstıkalyq habtyń irgetasy qalandy.
