BQO-da qomaqty qaryzy bar azamattar shetelge emin-erkin shyǵyp júrgen
Oblys prokýratýrasynyń baspasóz qyzmeti usynǵan málimetke súıensek, atalǵan mekeme júrgizgen tekseris kezinde atqarý qujattary teń bólinbegeni, májbúrlep oryndatý sharalary qabyldanbaǵany, oryndaý úshin aqsha negizsiz ustalǵany jáne boryshkerlerdiń jaýapkershilikten jaltarǵany anyqtalǵan.
Mysaly, bir sot oryndaýshysy memleketke 10,1 mln teńge qaryzy bar azamattyń jer telimine 2016 jyldan beri tyıym salmaǵan.
Sondaı-aq boryshy 40 mln teńgege jetken 26 azamatqa shet elge shyǵýǵa tyıym salynbaǵan. Sonyń ishinde bir azamattyń qaryzy 2 mln teńge bolsa da, ol 2017 jyly Reseı Federatsııasyna birneshe ret baryp-kelgen.
Budan bólek, birqatar boryshkerler óz shottarynan qarajatty kedergisiz alyp júrgen. Aınalym qarjysy 1 mlrd teńgeden asqan.
Sot oryndaýshylary 256 atqarý qujatyn múlikke tyıym salmastan jáne óndirmesten qaıtarǵan. Sonyń saldarynan bıýdjetke 4,7 mln teńge túspedi. Jeke sot oryndaýshylary óndirý úshin adamdar buryn tólep qoıǵan, jalpy somasy 1,9 mln teńge bolatyn 139 ákimshilik aıyppuldy oryndaýǵa zańsyz qabyldaǵan.
Іshki ister organdarynda óndirilýge tıisti somasy 15,3 mln teńgeni quraıtyn 1352 ákimshilik materıal sot oryndaýshylaryna joldanbaǵan. Prokýrorlar 11 myńnan astam boryshkerdiń tabysy men eńbekaqysy, 3 myń adamnyń tyıym salynbaǵan múlki bar ekenin anyqtady.
Tekseris nátıjesinde prokýratýra 3 sotqa deıingi tergep-tekserý isin bastady. 60 mln teńge bıýdjetke qaıtaryldy. 12 adam ákimshilik, 60 laýazymdy qyzmetker tártiptik jaýapkershilikke tartyldy.
Palatadan tórt jeke sot oryndaýshysyn shyǵarý, bir jeke sot oryndaýshysynyń lıtsenzııasyn toqtata turý jóninde Ádilet mınıstrligine usynys engizildi.
