54 «eles stýdent» — BQO-da kolledj dırektorynyń bylyǵy ashyldy

ASTANA. KAZINFORM — QMA Batys Qazaqstan oblysy boıynsha departamenti bilim berý salasynda bıýdjet qarajatyn jymqyrý faktisi boıynsha sotqa deıingi tergep-tekserý júrgizip jatyr, dep habarlaıdy QMA baspasóz qyzmeti.

Vedomstvo málimetinshe, «Batys Qazaqstan ındýstrıaldyq kolledji» MKQK dırektory oqý protsesine qatyspaǵan 54 tulǵany jalǵan túrde bilim alýshy retinde tirkegen. Soǵan qaramastan, atalǵan tulǵalar belsendi stýdentter retinde kórsetilip, olar boıynsha jalǵan baǵalar qoıylǵan, sabaqqa qatysý tabelderi men úlgerim boıynsha qujattary rásimdelgen, sondaı-aq stıpendııalar berilgen (jekelegen jaǵdaılarda — kóterińki mólsherde).

— Jalǵan stýdentterdiń atyna banktik shottar ashylyp, sol shottarǵa stıpendııa tólemderderi aýdarylǵan. Banktik kartalar dırektorǵa nemese onyń nusqaýymen ózge tulǵalarǵa qolma-qol aqsha alý jáne qarajatty ári qaraı paıdalaný úshin tapsyrylyp otyrǵan. Nátıjesinde kolledj dırektory 49 mln teńgeden astam bıýdjet qarajatyn ıemdengen. Oǵan qatysty bultartpaý túrindegi úıqamaq sharasy qoldanyldy. Sot sanktsııasymen onyń páterine tyıym salyndy. Ózge aqparat QR QPK-niń 201-babyna saı jarııa etilmeıdi, — delingen habarlamada.

Osydan buryn Almaty oblysynda muǵalimderden aqsha jınamaq bolǵan dırektor jazalanǵany anyqtaldy.