BQO-da kólikti mas kúıde júrgizgen polıtsııa qyzmetkeri júrgizýshilik quqyǵynan aıyryldy

ORAL. KAZINFORM – Oral qalasynyń ákimshilik quqyq buzýshylyqtar jónindegi mamandandyrylǵan sotynda polıtsııa qyzmetkerine qatysty qaýly shyǵaryldy.

BQO sotynyń baspasóz qyzmetinen málim etkenindeı, Oral qalasy polıtsııa basqarmasynyń qyzmetkeri, polıtsııa maıory qyzmettik avtokóligin mas kúıinde júrgizgen.

Oǵan qosa ınspektorlardyń toqtaý týraly zańdy talabyn oryndamaı, oqıǵa ornynan boı tasalamaq bolǵan.

Polıtsııa qyzmetkerine QR Ákimshilik quqyq buzýshylyq týraly kodeksiniń 608-baby 1-bóligine (mas kúıinde kólik júrgizý) jáne 613-baby 1-bóligine (polıtsııa qyzmetkerleriniń toqtaý talabyn oryndamaý) sáıkes aıyp taǵyldy.

- Sot sheshimimen polıtsııa maıory 7 jyl merzimge kólik quralyn basqarý quqyǵynan aıyrylyp, oǵan 157 280 teńge kóleminde aıyppul salyndy. Іstiń materıaldary tártiptik jaýapkershilik máselesin sheshý úshin BQO polıtsııa departamentine joldandy. Atalmysh kodekstiń 32-babynyń erejelerine sáıkes polıtsııa qyzmetkerlerine ákimshilik qamaý qoldanylmaıdy. Sondyqtan jaza aıyppul men júrgizýshi kýáliginen aıyrýmen shekteldi. Qaýly zańdy kúshine engen joq, - dep habarlady vedomstvodan.

Eske sala keteıik, budan buryn BQO-da eks-sheneýniktiń sot sheshimimen qyzmettik úıden shyǵarylǵanyn jazǵan edik.