BQO-da kólikti mas kúıinde aıdaǵan 1,2 myń júrgizýshi kýáliginen aıyryldy
ORAL. QazAqparat - Batys Qazaqstan oblysynda kólikti mas kúıinde aıdaýshylar qatary azaımaı otyr, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, buryn avtokólikti mas kúıinde aıdaǵany úshin ákimshilik jaza alǵan júrgizýshiler osy quqyqbuzýshylyqty qaıtalap jasasa, qylmystyq jaýapkershilikke de tartylady.
Mysaly, 25 qańtar kúni Jańaqala aýdany Pıatımar aýylynda «Lada-21074» avtokóligin mas kúıinde aıdap kele jatqan 1990 jylǵy turǵyn ustaldy. Ol buǵan deıin kólik quralyn basqarý quqyǵynan úsh jylǵa aıyrylsa da, aýyldasynan mashına surap alyp, mas kúıinde rýlge otyrǵan. Endi QR QK 346-baby 1-bóligine sáıkes (kólik quraldaryn basqarý quqyǵynan aıyrylǵan, alkogoldik, esirtkilik jáne ýytqumarlyq masań kúıdegi adamnyń kólik quralyn basqarýy, sol sııaqty kólik quralyn osyndaı adamnyń basqarýyna berý) júrgizýshimen birge kólik ıesi de zań aldynda jaýap beredi. Bul bap boıynsha kináli bolǵandar belgili bir laýazymdardy atqarý nemese belgili bir qyzmetpen aınalysý quqyǵynan úsh jyl merzimge aıyryla otyryp, eki júz aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne eki júz saǵatqa deıingi merzimge qoǵamdyq jumystarǵa tartýǵa ne elý táýlikke deıingi merzimge qamaqqa alýǵa jazalanady.
Sol sekildi 27 qańtar kúni Aqsaı qalasynda «Volkswagen Passat» avtokóligin de júrgizýshisi mas kúıinde aıdaǵany anyqtaldy. Buryn júrgizýshi kýáliginen aıyrylǵan ol da QR QK 346-baby 1-bóligine sáıkes jaýapqa tartylady. Qazirgi kezde tergeý amaldary júrgizilýde.
Aıta keteıik, ótken jyly kólikti mas kúıinde aıdaǵan 1229 júrgizýshi QR Ákimshilik quqyqbuzýshylyq kodeksi 608-babyna sáıkes kýálikterinen aıyryldy.
