BQO-da kólik sý arnasyna túsip ketip, 2 adam mert boldy

ORAL. QazAqparat – Batys Qazaqstan oblysynda avtokólik sý arnasyna túsip ketip, eki adam mert boldy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, oqıǵa 2 qańtar kúni Aqjaıyq aýdany Alǵabas aýyldyq okrýgi aýmaǵynda boldy.

«Saǵat shamamen 15.30-da Toǵan aýylynan 3 shaqyrym jerde 1962 jylǵy júrgizýshi kóktaıǵaqqa baılanysty «Lada Vesta» avtokóliginiń rýline ıe bola almaı, Býdarın arnasyna túsip ketti. Jol apaty saldarynan avtokólikte otyrǵan 1961 jylǵy jolaýshy áıel oqıǵa ornynda qaza tapty. Túrli jaraqattarmen taǵy eki áıel Oraldaǵy qalalyq kópbeıindi aýrýhanaǵa jetkizilgenimen, bireýi sonda jansaqtaý bóliminde qaıtys boldy. Qazirgi kezde QR QK 345-baby 4-bóligine sáıkes sotqa deıingi tergeý amaldary júrgizilýde. Tıisti saraptamalar taǵaıyndaldy», dep habarlady vedomstvodan.

BQO densaýlyq saqtaý basqarmasynyń naqtylaýynsha, úshinshi áıel qalalyq aýrýhananyń jansaqtaý bóliminde jatyr.

Eske sala keteıik, budan buryn Batys Qazaqstanda sábizge qaqalyp qalǵan sábıdiń kóz jumǵanyn jazǵan bolatynbyz.

Vıdeo áleýmettik jeliden