BQO-da kólik qatynasy úzilgen aýyldardan 11 júkti áıel shyǵaryldy
BQO TJ departamentiniń baspasóz qyzmetinen málim etkenindeı, sońǵy táýlikte jaǵdaıdy turaqtandyrý maqsatynda qaýipti ýchaskelerde ınertti materıaldar salynǵan 3 myńǵa jýyq qap tóseldi.
Jumystar Báıterek, Bórli, Qaratóbe, Shyńǵyrlaý aýdandarynda jáne Oral qalasynda júrgizilýde. Sonymen qatar sý basqan aýdandarda táýligine 40 myńnan astam tekshe metr sý soryldy.
Oral qalasynyń shetinde Derkól jáne Shaǵan ózenderiniń arnalarynda sý deńgeıine monıtorıng júrgizý úshin baqylaý beketteri qoıyldy. Sý deńgeıi saǵat saıyn ólshenedi.
Qutqarýshylar jergilikti atqarýshy organdarmen birge Derkóldegi sý deńgeıiniń kóterilýine baılanysty Báıterek aýdany Zelenyı aýylynda alty kún boı sý tasqynyna qarsy kúresti. Sonyń nátıjesinde osy aýylda turǵyn úılerdi sý basýǵa jol berilmedi. Qazirgi tańda ózendegi sý deńgeıi tómendep, qaýip seıildi. Dostyq aýylynda da osyndaı is-sharalar atqaryldy.
BQO TJ departamenti bastyǵynyń orynbasary Qanat Dospaev joldy sý shaıyp ketýi saldarynan kólik qatynasynsyz qalǵan eldi mekenderdegi ahýal týraly aıtyp berdi.
Onyń sózine qaraǵanda, qutqarýshylar qaýip-qater men boljamdardy eskere otyryp, kúni jaqyn júkti áıelder men medıtsınalyq kómekke muqtaj adamdardy sý tasqyny bastalǵanǵa deıin alyp shyqty.
«Barlyǵy 11 júkti jáne 2 naýqas adam qaýipti jerden shyǵaryldy. Olardyń bir bóligi sý baspaǵan eldi mekenderdegi aýdandyq aýrýhanalarǵa, qalǵany týystarynyń úılerine ornalastyryldy», - dedi Q.Dospaev.
Sonymen qatar departament bastyǵynyń orynbasarlary ol aýyldarda azyq-túlik dúkenderi bar ekendigin aıtty. Dúken ıeleri qandaı ónim qajet ekendigi týraly málimetti ákimdikterge beredi. Ákimdikter satyp alǵan azyq-túlikti qutqarýshylar júzý quraldarymen jáne ótimdiligi joǵary tehnıkamen jetkizip beredi.
Sondaı-aq eldi mekenderde elektr qýatyna baılanysty oryn alǵan aqaý tez arada joıylyp, jaryq berilgen.
«Apattyq-qutqarý jáne shuǵyl jumystardy atqarýǵa Tótenshe jaǵdaılar, Іshki ister, Qorǵanys mınıstrlikteri jáne jergilikti atqarýshy organdardan 1 myńǵa jýyq adam, ınjenerlik tehnıka, motopompa, júzý quraldaryn, tikushaqty qosa alǵanda 400-den astam tehnıka qatysýda. Jergilikti atqarýshy organdar «Qazsýshar», «QazAvtoJol» ókilderiniń qatysýymen respýblıkalyq jáne oblystyq jedel shtab táýlik boıy jumys jasaýda», dep habarlady vedomstvodan.
Eske sala keteıik, budan buryn Oralda sý basý qaýpine baılanysty saıajaı turǵyndary evakýatsııalanǵanyn jazǵan bolatynbyz.
Sondaı-aq BQO-nyń Qaratóbe aýdanynda tótenshe jaǵdaı jarııalandy.
Batys Qazaqstanda 50-den astam turǵyn úı sýda qalyp qoıdy.