BQO-da kólik qaqqan er adam aıaǵynan aıyryldy
ORAL. QazAqparat – Batys Qazaqstan oblysynda er adamdy kólik qaǵyp ketti, jaǵdaıy aýyr, dep habarlaıdy QazAqparat tilshisi.
Oblystyq Densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqıǵa keshe Samara-Shymkent jolynda Syrym aýdany aýmaǵynda boldy.
Dádem ata aıaldamasyndaǵy jaıaý júrginshi jolynda avtokólik 58 jastaǵy er adamdy basyp ketti. Aıaǵynan aıyrylǵan zardap shegýshi oblystyq kópbeıindi aýrýhanaǵa jetkizildi.
«Qazir er adam jansaqtaý bóliminde jatyr. Jaǵdaıy turaqty, aýyr», - dedi QazAqparat tilshisine A.Saqposynova.
BQO Polıtsııa departamentiniń baspasóz qyzmeti oqıǵany rastap, «Lexus» avtokóliginiń júrgizýshisine qatysty QR QK-niń 345-baby 2-bóligine sáıkes tergeý amaldary júrgizilip jatqanyn jetkizdi.
Eske salaıyq, 17 qarasha kúni BQO-da taǵy bir jol apaty bolyp, 37 jastaǵy áıel men 4 jasar bala aýrýhanaǵa jetkizilgen bolatyn. Júrgizýshi – 37 jastaǵy er adam alǵashqy medıtsınalyq kómekten keıin aýrýhanaǵa barýdan bas tartty.
«Kúni búgin balanyń jaǵdaıy óte aýyr. Aqjaıyq aýdandyq aýrýhanasynda jatqan ol bas pen mıdyń ashyq jaraqatyn alǵan. Al anasy ambýlatorlyq em alýǵa jiberildi», - dep málim etti zardap shekkenderdiń densaýlyǵy jóninde A.Saqposynova.
