BQO-da kólik apatyna baılanysty qylmystyq is qozǵaldy
ORAL. QazAqparat – Batys Qazaqstan oblysynda Toyota Camry-diń júk kóligimen soqtyǵysýyna baılanysty qylmystyq is qozǵaldy, dep habarlaıdy QazAqparat tilshisi.
QazAqparat budan buryn habarlaǵanyndaı, DAF júk kóligine soǵylǵan Toyota Camry júrgizýshisi oqıǵa ornynda kóz jumǵan bolatyn.
BQO densaýlyq saqtaý basqarmasy baspasóz qyzmetiniń naqtylaýynsha, jol apaty jóninde habar 18 qazan kúni saǵat 15.47-de tússe, jedel járdem kóligi 16.10-da jetken.
Jeńil kóliktiń rýlinde bolǵan Báıterek aýdanynyń 34 jastaǵy turǵyny qaza tapsa, jol apatynan taǵy úsh adam zardap shekti.
Sonyń ishinde Báıterek aýdany Kóshim aýylynyń 26 jastaǵy turǵyny bileginen kóptegen synyq jaraqattaryn alyp, áýeli Aqjaıyq aýdandyq aýrýhanasyna jatqyzyldy. Keıin oblystyq kópbeıindi aýrýhanaǵa aýystyryldy.
Mıy shaıqalǵan shymkenttik 28 jastaǵy turǵyn da aýdandyq aýrýhanaǵa jetkizildi. Dárigerge júgingen 27 jastaǵy taǵy bir shymkenttik turǵynnyń deni saý bolyp shyqty.
BQO polıtsııa departamentiniń resmı ókili Bolatbek Belgibekov osy oqıǵa boıynsha QR QK 345-baby 3-bóligine sáıkes qylmystyq is qozǵalyp, sotqa deıingi tergeý amaldarynyń júrgizilip jatqanyn jetkizdi.
