BQO-da kólik apaty bolyp, 3 bala zardap shekti
ORAL. QazAqparat – Batys Qazaqstan oblysynda jeńil avtokólik júk kóligimen soqtyǵysyp, tórt adam aýrýhanaǵa jetkizildi, dep habarlaıdy QazAqparat tilshisi.
BQO tótenshe jaǵdaı departamentiniń baspasóz qyzmeti málim etkenindeı, oqıǵa 12 qyrkúıek kúni saǵat 21.00-de Oral-Atyraý jolynyń 50-shaqyrymynda Aqjaıyq aýdany aýmaǵynda boldy.
«VAZ-2109» avtokóligi «MAN» júk kóligimen soqtyǵysqan.
Oqıǵa ornyna trassalyq medıtsınalyq-qutqarý beketiniń qyzmetkerleri baryp, tórt adam qutqaryldy. Olardyń bireýi 34 jastaǵy áıel bolsa, qalǵandary – 15, 10 jáne 8 jasar balalar.
Bári de Aqjaıyq aýdandyq ortalyq aýrýhanasyna jetkizildi.
Qazirgi kezde oqıǵanyń jaı-japsary anyqtalý ústinde.
Eske sala keteıik, budan buryn Oralda Ulttyq ulan jaýyngeriniń jol apatyna túsken júrgizýshini qutqarǵanyn jazǵan bolatynbyz.
