BQO-da kóktemgi sý tasqynynan zardap shekkenderge kómek kórsetiledi
Oblys ákimi Ǵalı Esqalıevtiń málim etkenindeı, Qaratóbe jáne Shyńǵyrlaý aýdanynda tótenshe jaǵdaı jarııalandy.
Onyń aıtýynsha, Qaratóbe aýdany Qoskól aýyldyq okrýgi Shalǵyn eldi mekeni mańynda muz jınalyp, qardyń tez erýine baılanysty turǵyn úılerdiń teń jartysyna sý kirdi.
«Osy aýylda bolyp, tıisti sheshimder qabyldadyq. Munda 197 adam tursa, sonyń 100-deıi eldi mekende qalǵan eken, onyń 37-si – balalar. Turǵyndardyń kópshiligi Qoskólge, qalǵany basqa aýyldarǵa, Oral qalasyna kóshiriledi. Oqýshylardyń jartysy Qoskólde, qalǵany Oralda bilim alatyn bolady. Shalǵynda mal men úıdi qaraıtyn er azamattar ǵana qalady. Jergilikti turǵyndardyń sózine qaraǵanda, mundaı tabıǵı apat atalmysh eldi mekende buryn bolmaǵan», dedi Ǵ.Esqalıev.
Óńir basshysy sondaı-aq Shyńǵyrlaý aýdanyndaǵy ahýalǵa toqtaldy.
Munda Shyńǵyrlaý men Segizsaı aýyldary arasyndaǵy joldy sý tasqyny toǵyz jerden shaıyp ótken. Sonyń saldarynan aýyldarǵa avtokólik qatynasy úzilgen. Bir-eki kúnde sýdyń ekpini báseńdegen kezde Oraldan qajetti materıaldar jetkizilip, joldar qalpyna keltiriledi.
Sonymen qatar sý Almaz aýylyna kireberistegi kópirdi buzyp ketti. Sondyqtan bul aýyldan Aqtóbe men Shyńǵyrlaýǵa qaraı qatynaý múmkin bolmaı qaldy. Degenmen dala joldary arqyly TJ tehnıkalarymen jetýge bolady.
«Barlyq aýyldar azyq-túlikpen, basqa da qajetti zattarmen qamtamasyz etildi. Qazir jaǵdaı baqylaýda. Eki aýdan boıynsha tótenshe jaǵdaı jarııalanýyna baılanysty tıisti komıssııalar jumys jasap, zardap shekkenderge memleket tarapynan qoldaý kórsetiledi. «Jumyla kótergen júk jeńil» degen, budan jergilikti kásipkerler de shet qalmaıdy dep oılaımyn», dedi oblys ákimi.
BQO TJ departamentiniń bastyǵy Ernur Ótegenovtiń sózine qaraǵanda, Shyńǵyrlaý aýdanynda joldardy sý shaıyp ketýi saldarynan 6 eldi meken (shamamen 2 myń adam) baılanyssyz qaldy.
Qaratóbe aýdany Shalǵyn eldi mekeninde 25 úı, 2 áleýmettik nysan sý astynda qaldy. 30 usaq mal qyryldy.
Qazirgi kezde oblystaǵy jaǵdaı jedel shtabtyń baqylaýynda.
Eske sala keteıik, budan buryn Batys Qazaqstanda aýyl mektebine sý kirgenin, tasqyn sýdyń ótkeldi shaıyp ketkenin jazǵan bolatynbyz.
Sondaı-aq sý kirgen 25 úıdiń adamdary basqa jaqqa kóshirildi.
BQO-da joldy sý shaıyp ketkendikten birneshe aýylmen qatynas úzildi.
