BQO-da kóktemgi sý tasqynyna baılanysty ázirlik sharalary pysyqtaldy
ORAL. QazAqparat - Batys Qazaqstan oblysynda kóktemgi sý tasqynyna baılanysty ázirlik sharalary júrgizilýde. Bul týraly oblys ákimi Altaı Kólginovtiń tóraǵalyq etýimen ótken tótenshe jaǵdaılardyń aldyn alý jáne olardy joıý jónindegi komıssııa otyrysynda aıtyldy, dep habarlaıdy «QazAqparat» tilshisi.
«Qazgıdromet» RMK málimetterine qaraǵanda, oblys aýmaǵynda kúzgi ylǵal men qar qory qalyptaǵydan 30-80 paıyzǵa tómen. Óńirdegi sý kózderiniń 80 paıyzy bastaýyn Reseıden alady. Mysaly, Qaraózenniń Saratov oblysy Novoýzen qalasy gıdrobeketindegi sý deńgeıi qalyptaǵydan (1025 sm) 70 paıyzǵa (759 sm) tómen bolmaq. Sol sekildi Saryózendegi sý deńgeıi 26 paıyzǵa tómen bolmaq. Jaıyq ózeni boıynsha boljam naýryz aıynyń aıaǵynda jasalady.
BQO TJ departamentiniń bastyǵy Jasulan Jumashevtiń aıtýynsha, ótken jyly birqatar sý qoımalary men gıdrotehnıkalyq qurylymdar kúrdeli jóndelip, Oral qalasynyń shaǵynaýdandarynda sý ótkizetin turbalar tartyldy. Oǵan qosa «Juldyz» shaǵynaýdanynda 493,4 mln teńgege joldardy salǵan kezde qar sýy men jańbyrdan qorǵaıtyndaı jaǵdaı jasaldy.
Bıyl arnaıy josparǵa sáıkes keshendi sharalar atqarylýda.
Tótenshe qorda 1,3 mlrd teńge qaraldy. Kóktemgi sý tasqynyna qajetti 165 tonna janar-jaǵar maı, 83,4 myń dana qap, 12,4 myń tonna ınertti materıaldar ázirlendi. Jarylǵysh zattardy jaratyn mamandardy tartý úshin 11,6 mln teńge, aerobaqylaýǵa 14,7 mln teńge jáne ǵaryshtyq monıtorıng júrgizýge 6,5 mln teńge qaraldy. Eldi mekenderden 115 myń tekshe metr qar shyǵaryldy.
Oblysta 2794 adam, 682 tehnıka, 88 júzý quraldary daıyn.
Oblys ákimi Altaı Kólginov kóktemgi sý tasqyny kezinde eń aldymen adamdardyń zardap shekpeýi qajettigin eskertip, sondyqtan barlyq gıdroqurylymdardy aldyn ala muqııat tekserip, tótenshe jaǵdaılardyń aldyn alýdy tapsyrdy.
