BQO-da kóktemgi sý tasqynymen kúreske rezervte 1,5 mlrd teńge qaralyp otyr
BQO TJ departamenti tótenshe jaǵdaılardy joıý basqarmasynyń bastyǵy Baqytjan Ihsanovtyń óńirlik kommýnıkatsııalar qyzmeti alańynda málim etkenindeı, qazirgi tańda 443 tonna janar-jaǵar maı, 88 myń dana qap, 22 myń tonna ınertti materıaldar qory daıyn.
Baqytjan Maǵzomulynyń sózine qaraǵanda, jarýshylar brıgadalary úshin 6,820 mln teńge, aerovızýaldi zertteýler júrgizýge tikushaqty tartýǵa 16,7 mln teńge, qaptar satyp alýǵa 2,895 mln teńge kóleminde kelisimshart jasaýǵa qarajat kózdelgen.
Tasqyn sýlardyń ótýi boıynsha Aqtóbe, Atyraý jáne Reseıdiń kórshiles oblystarymen boljamdar men jedel aqparatpen turaqty túrde almasý jumysy júrgizilýde.
Kóktemgi sý tasqyny kezinde tótenshe jaǵdaıdy joıýǵa 2591 adam, 734 tehnıka, 45 júzý quraly jáne 295 motopompa tartylmaqshy. Kúsh-quraldardyń daıyndyǵy «Kóktem-2021» respýblıkalyq komandalyq shtabtyq oqý-jattyǵý barysynda tekseriletin bolady.
Kúni búgin barlyq ózender qysqy rejımde, jaǵdaı turaqty.
«Qazirgi kezde qala men eldi mekenderden 461 myńnan astam tekshe metr qar shyǵarylyp, 1150 tekshe metr erigen sý soryldy. Jyl saıyn kóktemgi sý tasqyny kezinde aýla aýmaqtary men eldi mekender kóshelerin erigen sý basý qaýpi týyndaıdy. Munyń sebepteriniń biri – qardy ýaqtyly shyǵarmaý. QR Ákimshilik quqyqbuzýshylyq kodeksiniń 505-babyna sáıkes Oral qalasynda aýmaqty abattandyrý erejesin buzǵany, ıaǵnı qardy ýaqtyly shyǵarmaǵany úshin 4 kásipker jaýapkershilikke tartyldy», dedi B.Ihsanov.