BQO-da kóktemgi dala jumystaryn qarjylandyrýǵa 10,9 mlrd teńge jumsalmaq

ORAL. KAZINFORM — Batys Qazaqstan oblysynda maıly jáne mal azyqtyq daqyldar, sonymen qatar kartop otyrǵyzylatyn alqaptardy ulǵaıtý kózdelip otyr.

BQO aýyl sharýashylyǵy basqarmasynyń basshysy Jasulan Halıýllınniń málim etkenindeı, Memleket basshysy aldaǵy jyldary aýyl sharýashylyǵy salasyna jalpy ónim kólemin 2 esege arttyrý jóninde naqty mindetterdi júktegen bolatyn.

Jasulan Joldybaıulynyń sózine qaraǵanda, osy tapsyrmany oryndaý maqsatynda mınıstrlikpen 2024-2028 jyldary aýyl sharýashylyǵyndaǵy jalpy ónim kólemin 2 esege ulǵaıtý jóninde arnaıy jol kartasy daıyndalyp, bekitildi.

- Jol kartasy boıynsha bıyl bıdaı egisiniń jospary – 202 myń ga, arpa 60 myń ga bolsa, maıly daqyldar 119 myń ga, mal azyqtyq daqyldar 199 myń ga, sonyń ishinde birjyldyq shópter 18 myń ga, kartop 2,1 myń gektar alqapqa otyrǵyzylmaq. Sondaı-aq engiziletin tyńaıtqyshtar kólemin 46,9 myń tonnaǵa deıin arttyryp, aýyl sharýashylyǵy tehnıkalary parkin 6,5 paıyzǵa jańartý, elıtalyq tuqymdar úlesin 4,7 paıyzǵa, sýarmaly jer alqabyn 13,7 myń gektarǵa deıin ulǵaıtý kózdelýde, - deıdi J.Halıýllın.

Onyń aıtýynsha, bıyl kóktemgi dala jumystaryn qarjylandyrýǵa 10,9 mlrd teńge qaralsa, sonyń ishinde ósimdik sharýashylyǵyn sýbsıdııalaý baǵdarlamalary men qyzmetter kórsetýge jergilikti bıýdjetten 2,6 mlrd teńge bólingen. Al «Keń dala» jáne «Keń dala – 2» nesıeleý baǵdarlamalary boıynsha 8,3 mlrd teńge qarastyrylǵan.

- Jalpy alǵanda, oblysta sýbsıdııalaý baǵdarlamalary boıynsha sharýalar aldynda bereshekter joq. Kúni búgin ósimdik sharýashylyǵyna qaralǵan qarajattar esebinen agroqurylymdarǵa 255 mln teńge sýbsıdııa tólense, «Keń dala» jáne «Keń dala – 2» baǵdarlamalary arqyly 5 mlrd teńgege jýyq nesıe berildi. Jazdyq egiske qajet tuqym kólemi 29,4 myń tonna bolsa, ol tolyqtaı daıyndaldy. Qazirgi ýaqytta tuqym satýshylarmen jasalǵan kelisim-sharttar negizinde keıbir dıqandarǵa tuqym áli de jetkizilýde, - deıdi basqarma basshysy.

Sharýalar dala jumystaryna qatysatyn tehnıkalar daıyndyǵyn da ýaqytynda pysyqtady. Keıbir aýdandarda tehnıkalar egis dalasyna shyǵyp jatyr. Oblys boıynsha jalpy esepte 30 038 aýyl sharýashylyǵy tehnıkasy bar. Kóktemgi dala jumystaryna 3 136 traktor, 2 097 dán sepkish, 646 qopsytqysh jáne basqa tehnıkalar qatysady.

- Maýsymdyq jumystardy ýaqtyly atqarý úshin dıqandardy arzandatylǵan dızel otynymen qamtý óte mańyzdy. Bıyl bizdiń óńirge Atyraý munaı óńdeý zaýytynan 8,4 myń tonna arzandatylǵan dızel otyny bólindi. Qajet dızel otynynyń kólemi sharýalardyń ózderi usynǵan ótinimderi negizinde elektrondy túrde qalyptastyryldy. Jetkizýshi operator «Petro Retail» JShS, 1 lıtrdiń baǵasy – 254 teńge. Kestege sáıkes naýryz aıyna qaralǵan 1,8 myń tonna dızel otynyn operator tolyqtaı alyp, aýyl sharýashylyǵy qurylymdaryna jiberýde. Búginde sharýalarǵa 250 tonna (14 paıyz) dızel otyny berildi, - dedi J.Halıýllın.

Onyń málimdeýinshe, bıyl oblystyq bıýdjet esebinen 192,3 myń ga jerde saıaq shegirtkelerge qarsy óńdeý jumystaryn júrgizý josparlanýda. Ol úshin qajetti qarajat berilip, óńdeý jumystaryn júrgizetin mekemeler anyqtaldy. Atap aıtqanda, «ZapKazFýmıgatsııa» JShS Terekti, Aqjaıyq jáne Shyńǵyrlaý aýdandarynyń aýmaǵynda 79,7 myń ga jerdi óńdeıdi. Al «Magtoksın» JShS úlesine Bókeı ordasy, Bórli, Jańaqala, Jánibek, Kaztalov, Qaratóbe, Syrym, Tasqala, Báıterek aýdandary men Oral qalasynyń aýmaǵynan 112,6 myń ga jer tıip otyr.

Eske sala keteıik, budan buryn Batys Qazaqstanda 613 myń gektar alqapqa daqyldar egý josparlanyp otyrǵanyn jazǵan bolatynbyz.