BQO-da «Kóktem-2017» oqý-jattyǵý sharasyna 10 myńnan astam adam qatysty
ORAL. QazAqparat - Batys Qazaqstan oblysynda «Kóktem-2017» respýblıkalyq oqý-jattyǵý sharasy ótkizilip, kóktemgi sý tasqynyna daıyndyq barysy pysyqtaldy, dep habarlaıdy «QazAqparat» HAA tilshisi.
Oblys ákiminiń orynbasary Baǵdat Azbaev jetekshilik etken oqý-jattyǵý barysynda Oral qalasy tóńiregindegi saıajaı aýmaǵynda turatyn turǵyndarǵa habarlandyrý taratylyp, «Ivýshka» sanatorııinen qyzmetshiler men balalar shuǵyl kóshirilip, Derkól aýyldyq mádenıet úıindegi evakýatsııalaý qosynyna ornalastyryldy. Sondaı-aq Vetelkı aýyly men Kýrenı aýdany mańyndaǵy bógetti kúsheıtý jáne sý ótkizetin qubyrlardy tazalaý, Derkól jáne Shaǵan ózenderinde muz oıý jumystary júrgizildi.
Osyndaı oqý-jattyǵý sharalary oblys aýdandarynda da uıymdastyryldy.
BQO TJ departamentiniń bastyǵy, general-maıor Jasulan Jumashevtiń aıtýynsha, oqý-jattyǵýǵa óńirde 10 myńnan astam adam, 2 myńdaı tehnıka qatystyryldy. Ózenderde muz oıý, qaladan qar shyǵarý, sý sorý, sý júretin qubyrlar men aryqtardy tazalaý sekildi barlyq josparly sharalar atqarylýda. Jalpy, kóktemgi sý tasqynynan keler qaýip joq.
Aıta keteıik, BQO TJ departamentinen túsken málimetke qaraǵanda, «Jaıyq taza qala» JShS kúni búginge deıin qala aýmaǵynan 551 726 tekshe metr qardy shyǵaryp, 18 042 tekshe metr sýdy sordy. Ásirese, erigen qar sýy úılerge kirýi múmkin aýmaqtar erekshe baqylaýǵa alynǵan. Atalmysh mekemeniń kóktemgi sý tasqyny kezinde jumys jasaıtyn 72 arnaıy tehnıkasy bolsa, sonyń 18-i - sý aıdaıtyn mashınalar men qurylǵylar. Oǵan qosa sý tasqynyna qarsy qoldanylatyn materıaldar da ázirlenip qoıyldy.
