BQO-da kóktaıǵaqtan jaraqat alǵandar sany 860-tan asty

ORAL. KAZINFORM – Batys Qazaqstan oblysynda jeltoqsan aıynan beri 863 adam kóktaıǵaq kezinde qulap, zardap shekti.

BQO densaýlyq saqtaý basqarmasynyń baspasóz qyzmetinen málim etkenindeı, naýqastardyń aıaq-qolynyń jumsaq tinderi soǵylǵan. Aıaq-qoldary synǵan, jabyq bas-mı jaraqatyn alyp, mıy shaıqalǵan.

Basqarma málimetine qaraǵanda, sonyń ishinde 356-sy aýrýhanaǵa jatqyzyldy. Ambýlatorlyq em alǵan naýqastarǵa túrli medıtsınalyq kómekter ( gıps salý, synyqtardyń jabyq repozıtsııasy, jaralardy óńdeý) kórsetildi.

- 2024-2025 jylǵy qysqy mezgilde 1 766 adam kóktaıǵaqtan jaraqat alǵan edi. Kóktaıǵaq kezinde oqys jaǵdaıǵa tap bolmaý úshin tabany taımaıtyn aıaqkıim kıip, abaılap júrý, qoldy qaltaǵa salmaý kerek. Qajet bolsa, muzǵa qarsy japsyrma qoldanǵan jón. Kóktaıǵaq kúnderi, ásirese, jasy ulǵaıǵan adamdar úshin syrtqa shyqpaý da mańyzdy, - dep habarlady vedomstvodan.

Eske sala keteıik, budan buryn BQO aýrýhanasynda patsıentter úshin jaǵdaı jasalmaǵany ras pa, sony jazǵan edik.