BQO-da kóktaıǵaqqa baılanysty barlyq joldar jabyldy
ORAL. QazAqparat - Batys Qazaqstan oblysynda kóktaıǵaqqa baılanysty barlyq baǵyttaǵy joldar jabyldy, dephabarlaıdy QazAqparat tilshisi.
BQO TJ departamentinen alynǵan málimetke qaraǵanda, jergilikti saǵat 19.00-den bastap kólik qozǵalysyna shekteý qoıyldy. Qazirgi kezde bul jóninde turǵyndarǵa sms-habarlamalar jiberilýde.
Sonymen qatar, «Qazgıdromet» RMK BQO fılıalynyń málimeti boıynsha 14 jeltoqsan kúni óńirdiń keı jerlerinde burqasyn bolady. Ońtústik-shyǵystan soltústik-batysqa aýysyp soǵatyn jeldiń jyldamdyǵy sekýndyna 15-20 metrge deıin jetýi yqtımal.
Osyǵan baılanysty BQO TJ departamenti taǵy da eskertý jarııalady.
Oblysta kóktaıǵaqqa baılanysty jaǵdaı kúrdelenip ketti. Sonyń saldarynan, Oraldyń ózinde jaraqat alǵandar sany 355-ke jetti.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, osynshama adam 1 jeltoqsannan beri aýrýhanalardyń jaraqat pýnktine jolyqty. Olardyń kóbi bastan, aıaq-qolynan jaraqat alyp, mıy shaıqalǵan.
«Tek 13 jeltoqsan kúni tús qaıtqanǵa deıin 40 adam medıtsınalyq kómekke júgindi», - dedi A.Saqposynova.
BQO polıtsııa departamentiniń baspasóz qyzmetinen túsken málimetke qaraǵanda, 7-11 jeltoqsan aralyǵynda oblys aýmaǵynda qolaısyz aýa raıyna baılanysty oryn alǵan jol apattary saldarynan eki adam kóz jumsa, taǵy bireýi jaraqat aldy.
Oral qalasynyń ózinde 25 jol-kólik oqıǵasy tirkelip, avtokólik ıelerine materıaldyq zalal keldi.
Eske sala keteıik, budan buryn Oralda kóktaıǵaqqa baılanysty jaraqat alǵandar sany 200-den asqanyn, Batys Qazaqstanda birneshe joldyń jabylǵanyn jáne búgin aýa raıyna oraı eskertý jarııalanǵanyn jazǵan bolatynbyz.
