BQO-da qoqys suryptaý kesheni iske qosyldy
ORAL. KAZINFORM - Batys Qazaqstan oblysynyń Bórli aýdanynda qoqys suryptaý kesheni iske qosyldy. Innovatsııalyq nysannyń ashylýy Respýblıka kúni qarsańynda ótti.
Nysannyń ashylý saltanatyna BQO ákiminiń orynbasary Baqytjan Narymbetov, Bórli aýdany ákiminiń m.a. Altaı Týkjanov, BQO ekologııa departamentiniń basshysy Murat Ermekqalıev, KPO b.v. kompanııasynyń ókilderi jáne osy jobanyń negizin qalaýshy, Merlion Development Group kompanııasynyń basshysy Dınar Hamıev qatysty.
Sondaı-aq, keshen basshylyǵy, "Merlion Development Group" kompanııasynyń ókilderi, kásiporyn qyzmetkerleri qatysty. Lenta kesý dástúrinen keıin meımandar keshenge ekskýrsııa júrgizdi.
"Bizdiń kompanııa qaýipti qaldyqtardy qaıta óńdeý, zalalsyzdandyrý, kádege jaratý jáne (nemese) joıý jónindegi jobany iske asyrýda. Keshen qaldyqtardy kádege jaratýǵa arnalǵan ınsıneratordy, materıaldardyń ártúrli túrlerin qaıta óńdeýge arnalǵan suryptaý jelisin, makýlatýraǵa arnalǵan presterdi jáne PET-plastıkalyq bótelkelerdi, sondaı-aq aǵash qaldyqtaryn qaıta óńdeýge arnalǵan qurylǵylardy qosa alǵanda zamanaýı jabdyqtarmen jabdyqtalǵan", - dep atap ótti "Merlion Development Group"JShS.
Aıta ketý kerek, qoqys suryptaý kesheni qurylys qaldyqtaryn, tozǵan arnaıy kıimderdi, jeke qorǵanys quraldaryn (JQQ), aǵash qaldyqtaryn qaıta óńdeýge, sondaı-aq karton men makýlatýrany, PET-ydystardy, alıýmınıı baktaryn, tómen jáne joǵary qysymdy polıetılendi, plastık pen kanıstrlerdi suryptaýǵa arnalǵan.
"Merlion Development Group" JShS BQO úshin taǵy bir biregeı jobany iske asyrýda. Italıandyq PetrolValves S. p. a kompanııasymen birlesip, kompanııa munaı-gaz jáne energetıka salalarynda qoldanylatyn joǵary tehnologııalyq bekitý armatýrasy men klapandaryn óndirýmen aınalysady. Ótken jyly atalǵan kásiporynǵa prezıdent Qasym-Jomart Toqaev kelip, óz baqylaýyna alǵan bolatyn.
"40 myń turǵyny bar Aqsaı qalasynda negizinen ınnovatsııalyq nysandar ornalasqan. Bul joba - solardyń biri de, biregeıi. Jobanyń ınvestıtsııa kólemi 800 mln. teńgeni qurady. Keshenniń óndiristik qýaty jylyna 5000 tonna qaldyqty quraıdy. Sonymen qatar, 12 jumys orny ashyldy. Álemdik tájirıbede qoqystardy suryptaý qorshaǵan ortany qorǵaý úshin ǵana emes, sonymen qatar ónerkásip pen bıznes úshin de mańyzy zor. Qaldyqtardyń shamamen úshten ekisi qaıta óńdeledi, óıtkeni óndirýshilerge olardan shıkizat alý arzanyraq jáne tıimdirek. Bıyl elimizde halyqaralyq tájirıbeni eskere otyryp, osy salany jeńildikpen qarjylandyrý tetigi ázirlendi. "Ónerkásipti damytý qory" arqyly 3% syıaqy mólsherlemesimen jáne 3 jyldan 15 jylǵa deıingi merzimmen qarjylandyrý kózdelgen. Jobalarǵa 3 jylǵa bólingen qarajattyń jalpy kólemi shamamen 200 mlrd teńgeni quraıdy. Osy baǵdarlamanyń kómegimen keshenniń jumysyn keńeıte túsý qajet", - dedi BQO ákiminiń orynbasary Baqytjan Narymbetov.
