BQO-da qoqys polıgonynda turatyn 10 jastaǵy balanyń anasy ata-ana quqyǵynan aıyryldy
ASTANA. KAZINFORM – Batys Qazaqstan oblysynyń kámeletke tolmaǵandardyń isteri jónindegi mamandandyrylǵan sot «Otbasylyq úlgidegi oblystyq balalar aýyly» KMM-niń 10 jastaǵy balanyń quqyǵyn qorǵaý týraly talap qoıýyn qoldap, ony turmys jaǵdaıynyń qaýiptiliginen jáne anasynyń qoǵamǵa jat minez-qulqynan qorǵady.
Bala týǵan sátinen bastap qoǵamǵa jat ómir saltyn ustanǵan, spırttik ishimdikterdi asyra paıdalanǵan anasymen birge turǵan. Anasy qaraýsyz qalǵan úıdi bógde adamdardyń turaqty jınalatyn ornyna aınaldyrǵan.
Bala eshqashan mektepke barmaǵan, oqyp-jazýdy bilmegen, al tamaǵy men kıimin qoqys úıindisinen taýyp otyrǵan.
Kámeletke tolmaǵandardyń isteri jónindegi komıssııanyń bastamasymen bala úsh aı merzimge arnaıy áleýmettik qyzmetterge muqtaj balalardy qoldaý ortalyǵyna ornalastyrylǵan.
Odan keıin, 2026 jyly psıhologııalyq-medıtsınalyq-pedagogıkalyq konsýltatsııanyń qorytyndysy jáne bilim basqarmasynyń buıryǵy negizinde bala otbasylyq úlgidegi balalar aýylyna qamqorlyqqa berilgen.
Anasy osy ýaqyt ishinde ulyna bir ret te kelmegen, onyń taǵdyryna nemquraıly qaraǵan.
Jaýapker sot otyrystaryna shaqyrylǵanyna da qaramastan, olarǵa kelmegen.
Sot talqylaýyna qatysqan psıhologtyń qorytyndysyna sáıkes, balanyń aýyr psıhologııalyq jaraqaty bar jáne anasyna degen emotsıonaldyq baılanysy tolyǵymen joǵalǵan. Bala anasynan qatty qorqady, óıtkeni onyń ózin qaıtadan qoqys úıindisine alyp ketýinen qaýiptenedi.
Bala balalar aýylynda turǵandy unatatynyn, sebebi munda taza tósek jáne jaqsy tamaq bar ekenin aıtqan.
Osy mán-jaılardy eskere otyryp, sot anasynyń ata-ana mindetterin qasaqana jáne uzaq ýaqyt boıy oryndaýdan jaltarǵanyn, sondaı-aq onyń ómir saltyn ózgertýge nıeti bolmaǵanyn dáleldengen dep tanydy.
Anasy ata-ana quqyqtarynan aıyryldy. Odan balany asyraýǵa alıment óndirilip, olar balanyń jeke depozıttik shotyna aýdarylýǵa tıis.
Joǵarǵy Soty balanyń quqyqtary men múddeleri qorǵalǵanyn habarlady.
Sot sheshimi zańdy kúshine endi.
