BQO-da qoǵamdyq kólikter demalys kúnderi de júretin boldy
ORAL. QazAqparat – Batys Qazaqstan oblysynda qoǵamdyq kólikter demalys kúnderi de júretin boldy, dep habarlaıdy QazAqparat tilshisi.
BQO bas memlekettik sanıtar dárigeriniń bıylǵy 16 tamyzdaǵy «Batys Qazaqstan oblysy aýmaǵynda karantındik shekteý sharalaryn kezeń-kezeńmen jeńildetý týraly» qaýlysyna birqatar ózgerister men tolyqtyrýlar engizildi.
Jańa qaýlyǵa sáıkes 31 tamyzdan bastap qalaaralyq, oblysishilik avtobýstardyń, shaǵyn avtobýstardyń qozǵalysyna da ruqsat berildi.
Sondaı-aq sanıtarlyq normalarǵa sáıkestik aktisiniń negizinde dinı nysandar (meshitter, shirkeýler, soborlar, sınagogalar jáne t.b.) (jeke, ujymdyq is-sharalar ótkizilmeıdi);
- basseınder (jeke formatta, 1 kelýshige 5 sharshy metr sý beti esebinen, aldyn ala jazylý arqyly) jumys kúnderi saǵat 07.00-den 22.00-ge deıin;
- jattyǵý zaldary (1 kelýshige 5 sharshy metrge deıin, aldyn ala jazylý arqyly) jumys kúnderi saǵat 07.00-den 22.00-ge deıin;
- sport keshenderi (1 kelýshige 5 sharshy metrge deıin jeke jáne toptyq jattyǵýlar úshin) jumys kúnderi saǵat 07.00-den 22.00-ge deıin;
- mádenıet nysandary (1 kelýshige 5 sharshy metrge deıin, tolymdylyǵy 50 paıyzdan aspaıdy, onyń ishinde keminde 2 metr áleýmettik qashyqtyqty saqtaı otyryp, 30 adamǵa deıin ujymdyq daıyndyqtar, úzilisterde bólmelerdi jeldetý, betperde taǵý) jumys jáne demalys kúnderi saǵat 09.00-den 18.00-ge deıin;
- erekshe qorǵalatyn tabıǵı aýmaqtar: memlekettik ulttyq tabıǵı parkter, qoryqtar, rezervattar (jeke jáne uıymdasqan toptar úshin 15 adamnan aspaıtyn, áleýmettik araqashyqtyqty saqtaı otyryp, keminde 2 metr, betperde taǵý) jumys isteıtin bolady.
Al aýyl sharýashylyǵy, azyq-túlik jármeńkelerin indetke qarsy kúres sharalaryn, sanıtarlyq-epıdemıologııalyq talaptardy qatań saqtaı otyryp, demalys kúnderi saǵat 09.00-den 18.00-ge deıin ótkizýge bolady.
Degenmen saýyqtyrý jáne mektep janyndaǵy lagerlerdiń, jaǵajaılardyń, barlyq oıyn-saýyq nysandarynyń (ashyq aýadaǵy attraktsıondardy qospaǵanda), kınoteatrlardyń, fýdkorttardyń, banket zaldarynyń, oıyn alańdarynyń barlyq túrleriniń (aýlalardaǵyny qospaǵanda), túngi klýbtardyń, barlardyń, karaokeniń, kompıýterlik jáne oıyn klýbtarynyń, kalıandyq, býkmekerlik keńselerdiń, keıterıngtik qyzmetter kórsetýdiń jáne merekelerdi uıymdastyrý jónindegi qyzmetterdiń, menshik nysanyna qaramastan, mektepke deıingi balalar mekemeleri (kezekshi toptardy qospaǵanda) qyzmeti burynǵysha toqtatyla turady.
Oǵan qosa saýda úıleri men ortalyqtary (býtıkter, pavılondar), saýda jelileri (ishinde ornalasqan azyq-túlik sýpermarketter men dárihanalardy qospaǵanda), jabyq azyq-túliktik emes jáne azyq-túlik bazarlary, sulýlyq salondary, shashtarazdar, kosmetologııalyq qyzmet kórsetetin nysandar, ЅRA ortalyqtar (salondar), fıtnes ortalyqtary, monshalar, saýnalar, ashyq aýadaǵy attraktsıondar, dinı nysandar, basseınder, jattyǵý zaldary, sport keshenderi demalys jáne mereke kúnderi Qazaqstan Respýblıkasynyń eńbek zańnamasyna sáıkes jumys istemeıdi.
Eske sala keteıik, budan buryn Batys Qazaqstanda karantındik sharalar jeńildetiletinin, bastaýysh synyp shákirtteri úshin 2500-den astam kezekshi synyp ashylatynyn jazǵan bolatynbyz.
