BQO-da qoǵamdyq keńester quramy bekitildi (FOTO)
ORAL. QazAqparat - Batys Qazaqstan oblystyq máslıhatynyń 23 aqpan kúngi 31-sessııasynda BQO-daǵy qoǵamdyq keńester týraly ereje men keńes quramy bekitildi.
Oblystyq máslıhat hatshysy Málik Qulshardyń aıtýynsha, qoǵamdyq keńester óńirlerde Elbasy tapsyrmasyna jáne «Qoǵamdyq keńester týraly» Zań negizinde qurylýda. Qoǵamdyq keńesti qalyptastyrý jónindegi jumys tobynyń konkýrsyna sáıkes memlekettik organdar, úkimettik emes uıymdar jáne kommertsııalyq emes uıymdardan barlyǵy 55 azamat usynylǵan. Solardyń ishinen irikteýden ótip, komıssııa músheleriniń daýys berýi nátıjesinde 41 adam qoǵamdyq keńes quramyna kirse, sonyń 13-i - memlekettik organdar ókilderi, 13-i - aýdandar men qala qoǵamdyq kelisim keńesteriniń tóraǵalary, 15-i - úkimettik emes jáne kommertsııalyq emes uıymdar ókilderi. Keńes quramynda qazaq, orys, ázirbaıjan, koreı jáne evreı ultynyń ókilderinen turatyn 32 er, 9 áıel adam bar. Batys Qazaqstan aýmaqtyq kásipodaqtar ortalyǵynyń tóraǵasy Erbol Salyqov keńes tóraǵasy, kásipker, «Jańarý» sybaılas jemqorlyqqa qarsy jalpyulttyq qozǵalys» respýblıkalyq qoǵamdyq birlestigi BQO fılıalynyń dırektory Aqserik Áıtimov hatshysy bolyp saılandy.
Sessııa sońynda oblys ákimi Nurlan Noǵaev Uly Otan soǵysy jáne eńbek ardageri, 1945 jyly Máskeýdegi Jeńis sherýine qatysqan, uzaq jyldar boıy BQO prokýrorynyń orynbasary qyzmetin atqarǵan Ivan Gapıchke «BQO-nyń qurmetti azamaty» belgisin tabys etip, lentasyn taqty. Osymen mundaı joǵary ataq on birinshi adamǵa berilip otyr.
Óńir basshysy sondaı-aq besinshi shaqyrylymdaǵy oblystyq máslıhat depýtattaryna jemisti qyzmeti úshin alǵysyn bildirdi. Bir top depýtat Batys Qazaqstan oblysynyń qurmet gramotalarymen marapattaldy.
Aıta keteıik, Oral qalalyq máslıhatynyń 22 aqpan kúngi ótken 43-sessııasynda depýtattar tarapynan qoldaý tapqan qalalyq qoǵamdyq keńestiń quramyna 30 adam endi.
