BQO-da qyzmettik kólikterdiń jyldamdyq asyrý derekteri kóbeıgen
ORAL. KAZINFORM – Batys Qazaqstan oblysynda bıylǵy birinshi jartyjyldyqta qyzmettik avtokólikterdiń júrý jyldamdyǵyn asyryp, 119 buzýshylyq jasaǵany tirkeldi.
Memlekettik qyzmet isteri agenttigi BQO boıynsha departamentiniń bas mamany Dýlatbek Moldaǵalıevtiń ádep jónindegi keńestiń otyrysynda málim etkenindeı, Ákimshilik quqyq buzýshylyq týraly kodeksiniń 592-babyn (belgilengen júrý jyldamdyǵyn arttyrý) buzýshylyqtyń 21-i ortalyq memlekettik organdarǵa, 91-i jergilikti atqarýshy organdarǵa, jeteýi máslıhattarǵa tıesili.
Onyń sózine qaraǵanda, Báıterek aýdanynyń jergilikti atqarýshy organdarynda – 13, Terektide – 8, Syrym aýdandyq sanıtarııalyq-epıdemıologııalyq baqylaý basqarmasy jáne BQO qurylys basqarmasynda – 5, Oral qalasy men Aqjaıyq aýdanynda – 4, Bókeı ordasynda 3 buzýshylyq oryn alǵan.
– 119 buzýshylyqtyń 22-si qyzmettik avtokólikterdi qyzmetten tys ýaqytta, demalys jáne mereke kúnderi paıdalanýǵa qatysty boldy. Munyń tórteýi Aqjaıyq, úsheýi Bókeı ordasy, ekeýi Jánibek aýdany, bir-birden Ulttyq statıstıka bıýrosy BQO boıynsha departamenti men Qaratóbe aýdandyq máslıhatyna tıesili bolyp shyqty, – dedi D.Moldaǵalıev.
Bas mamannyń aıtýynsha, atalǵan derekterdi taldaý nátıjesi óńirdegi memlekettik organdarda jaýapty laýazymdy tulǵalardyń qyzmettik avtokóliktiń qozǵalysy men paıdalanylýyna tıisinshe baqylaý jasamaıtynyn kórsetedi. Sonyń ishinde qyzmettik avtokólikterdi maqsatsyz paıdalaný jáne jol júrý qaǵıdalaryn, ásirese, túngi mezgilde buzý tyıylmaı otyr.
Ádep jónindegi keńes otyrysynda sondaı-aq Kaztalov aýdany ishki saıasat bóliminiń basshysy Aıdana Muhambetovanyń tártiptik isi qaraldy. Ol qaraýynda jumys isteıtin bas maman Nyǵmetovaǵa qyzmet barysynda «Siz óz qateligińizdi túzetýdiń ornyna maǵan daýys kóterip, mynandaı sózdi qalaı aıtyp tursyz? Jyndy ekensiz ǵoı», degen.
Ádep normasyna saı kelmeıtin sózderdi aıtqany úshin A.Muhanbetovaǵa eskertý túrindegi tártiptik jaza qoldaný týraly sheshim qabyldandy.
Eske sala keteıik, budan buryn BQO-da avtokólikke masań kúıde otyrǵan aýyl ákimi qyzmetinen bosatylǵanyn jazǵan edik.
