BQO-da qyzmet babynda qaza tapqan polıtseıdiń otbasyna 9 mln teńge ótemaqy tólenbegen
ORAL. KAZINFORM — BQO kámeletke tolmaǵandar isteri jónindegi mamandandyrylǵan sotynda sońǵy úsh jyl úshin keltirilgen zııandy óteý jáne asyraýshysynan aıyrylýyna baılanysty aqshalaı tólemder taǵaıyndaý týraly azamattyq is qaraldy.
BQO sotynyń baspasóz qyzmetinen málim etkenindeı, talapker sotqa óz quqyqtaryn, sondaı-aq kámeletke tolmaǵan eki balanyń múddesin qorǵaý maqsatynda júgingen.
Sot talqylaýy barysynda talapkerdiń jubaıy – polıtsııa kapıtany M-nyń quqyq qorǵaý organdarynda qyzmet atqaryp, 2018 jyly qyzmettik mindetterin oryndaý kezinde qaza tapqany anyqtaldy. Qaıǵyly oqıǵanyń saldarynan otbasy asyraýshysynan jáne turaqty tabys kózinen aıyrylǵan.
Sot otyrysynda jaýapker talap aryz talaptaryn tolyq kólemde moıyndady.
Sheshim qabyldaý kezinde sot QR Úkimetiniń 2022 jylǵy 21 jeltoqsandaǵy №1048 qaýlysynyń 4-tarmaǵyn basshylyqqa aldy. Atalǵan qaýlyǵa sáıkes otbasy músheleriniń sany úsh nemese odan kóp bolǵan jaǵdaıda, árbir otbasy múshesine tólenetin aqshalaı tólem qaza tapqan qyzmetkerdiń aqshalaı qamtylýynyń 100 paıyzynan teń úlestermen belgilenedi. Alaıda barlyq otbasy múshelerine tólenetin jalpy tólem mólsheri 100 paıyzdan aspaýǵa tıis.
Sotqa usynylǵan anyqtamaǵa sáıkes qaza tapqan polıtsııa kapıtany M-nyń jalaqysy 264 444 teńge bolǵan. Atalǵan normatıvtik aktiniń talaptaryna sáıkes, sot bul somany úsh otbasy múshesine bólip, nátıjesinde árqaısysyna aı saıynǵy aqshalaı tólem mólsheri 88 148 teńge bolyp belgilendi.
Іsti qaraý qorytyndysy boıynsha sot talap aryzdy tolyq kólemde qanaǵattandyrdy.
Jaýapker mekeme – BQO mamandandyrylǵan kúzet qyzmeti basqarmasynan talapkerdiń paıdasyna 2022 jylǵy 19 qarashadan 2025 jylǵy 19 qarashaǵa deıingi kezeń úshin 3 mln 173,328 myń teńge mólsherinde zııandy óteý somasy óndirildi.
Sonymen qatar sot jaýapkerdi 2025 jylǵy 20 qarashadan bastap talapkerge ómir boıyna aı saıyn 88 148 teńge mólsherinde aqshalaı tólem tóleýge mindettedi.
Sondaı-aq sot kámeletke tolmaǵan balalardyń múddesinde áreket etetin talapkerdiń paıdasyna osyǵan uqsas kezeń úshin 6 mln 346,656 myń teńge mólsherinde zııandy óteý somasyn óndirdi.
2025 jylǵy 20 qarashadan bastap jaýapker árbir balaǵa kámeletke tolǵanǵa deıin aı saıyn 88 148 teńgeden tóleýge mindetti.
- Atalǵan sheshim zańnama talaptaryn saqtaý jáne qyzmettik boryshyn atqarý kezinde qaza tapqan quqyq qorǵaý organy qyzmetkeriniń otbasyna qatysty áleýmettik ádilettilikti qalpyna keltirý maqsatynda qabyldandy. Sot sheshimi zańdy kúshine engen joq, - dep habarlady vedomstvodan.
Eske sala keteıik, budan buryn zańsyz qýdalanǵan BQO turǵyny 7,7 mln teńge óndirip alǵanyn jazǵan edik.