BQO-da qyzylshamen aýrýhanaǵa túskender sany 10,5 esege artty
ORAL. KAZINFORM – Batys Qazaqstan oblysynda jyl basynan beri qyzylsha dıagnozymen 91 naýqas aýrýhanaǵa jatqyzyldy.
BQO densaýlyq saqtaý basqarmasynyń shtattan tys bas ınfektsıonısi, oblystyq juqpaly aýrýlar aýrýhanasy dırektorynyń emdeý isi jónindegi orynbasary Dergúl Aǵadilovanyń óńirlik kommýnıkatsııalar qyzmeti alańynda ótken brıfıngte málim etkenindeı, qyzylshamen aýyrǵandar sany 2024-2025 jyldary 100 esege (1603-ten 16-ǵa deıin) tómendegen edi.
Dergúl Muhamedqyzynyń sózine qaraǵanda, 2025 jyldyń jeltoqsan aıynyń sońynan bastap qaıta kóbeıdi. Atap aıtqanda, ótken jyldyń qańtar aıymen salystyrǵanda, aýrýhanaǵa túskender sany 10,5 esege (4-ten 42-ge deıin) artty.
– Jyl basynan beri oblystyq juqpaly aýrýlar aýrýhanasyna barlyǵy 91 naýqas jatqyzylsa, sonyń 61-i saýyǵyp shyqty. Em qabyldap jatqan 30 patsıenttiń 25-i – balalar, beseýi – eresekter. Eki bala jansaqtaý bóliminde. 91 naýqastyń 79-y nemese 86,8 paıyzy – balalar, sonyń ishinde 19-y 1 jasqa tolmaǵan, 12-si – eresekter. 79 balanyń 75-i nemese 95 paıyzy ekpe almaǵan. 50-iniń qyzylshamen aýyrǵany zerthanalyq túrde rastalǵan, qalǵandary qosymsha tekserilýde, - dedi D.Aǵadilova.
Dárigerdiń atap ótýinshe, qyzylsha – jeńil ótetin balalar aýrýy emes. Dert aýyr túrde ótip, pnevmonııa, aýyr larıngotraheıt, otıt, entsefalıt, ortalyq júıke júıesiniń zaqymdanýyna soqtyrýy múmkin. Sırek jaǵdaıda ólimniń tirkelýi yqtımal.
– Ásirese, 1 jasqa deıingi sábıler, egilmegen balalar men eresekter, júkti áıelder jáne ımmýnıteti álsiregen adamdar qaýip tobyna jatady. Naýqastardyń jansaqtaý bóliminde jatýy aýrýdyń aýyr ótý qaýpin kórsetedi. Qyzylshadan senimdi qorǵaný sharasy – vaktsınatsııa. Vaktsınatsııa Ulttyq profılaktıkalyq ekpeler kúntizbesine sáıkes júrgiziledi. Birinshi doza – 12 aıda, revaktsınatsııa – 6 jasta. Eki ret egilgen jaǵdaıda qorǵanysh deńgeıi 95 paıyzdan joǵary qalyptasady, - dep qosty D.Aǵadilova.
Óńirde epıdemııaǵa qarsy sharalar júrgizilip, ınfektsııa oshaqtaryna monıtorıng kúsheıtildi.
Eske sala keteıik, budan buryn BQO-da qyzylshamen aýyrǵan 60-qa jýyq adamnyń aýrýhanaǵa jatqyzylǵanyn jazǵan edik.
Sondaı-aq BQO-da aýrýhanaǵa aýyr jaǵdaıda túsken bala kóz jumdy.