BQO-da qyzylshamen aýyrǵandar sany 300-ge jýyqtady
ORAL. KAZINFORM — Batys Qazaqstan oblysynda bıylǵy jeti aıda 298 adamnyń qyzylsha juqtyrǵany tirkeldi.
BQO sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń óńirlik kommýnıkatsııalar qyzmeti alańynda ótken brıfıngte málim etkenindeı, bul ótken jylǵy osy kezeńdegiden (18) 280-ge artyq.
Gúldana Qaıyrjanqyzynyń sózine qaraǵanda, qyzylsha juqpasyna shaldyqqandardyń basym kópshiligi – ýaqytyly ekpe almaǵandar.
- Aýyrǵandardyń 252-si Oral qalasynda tirkelgen. Sondaı-aq 15-i Báıterek, 10-y Bórli, 9-y Terekti, tórteýi Kaztalov, eki-ekiden Qaratóbe, Syrym, Jańaqala, bireýi Shyńǵyrlaý aýdanynyń úlesine tıedi, - dedi G.Kereeva.
Onyń aıtýynsha, sonymen qatar parazıttik juqpalardan askarıdoz 5, ehınokokkoz 5, lıamblıoz 12 derekke kóbeıgen.
Esesine jiti ishek juqpalary – 44, jelsheshek – 1614 (54 paıyz), salmonellez – 26, menıngokokk – 1, jiti A vırýsty gepatıti – 2, sozylmaly vırýsty gepatıtter – 30, AITV – 20, jedel respıratorlyq vırýstyq ınfektsııalar – 24 317 (26,69 paıyz), tumaý – 157, kovıd-19 8 derekke azaıdy.
- 2024 jyldan bastap jatyr moıny obyrynyń aldyn alý maqsatynda adam papıllomasy vırýsyna qarsy vaktsınatsııalaý júrip jatyr. Qazirgi tańda oblys boıynsha 11-17 jas aralyǵyndaǵy 10 009 qyz bala vaktsına aldy. Jeti aıdyń qorytyndysy boıynsha oblysta bekitilgen halyq tizimine sáıkes maqsatty top balalary profılaktıkalyq ekpelermen 93,8 paıyzǵa qamtyldy, - dep qosty G.Kereeva.
Eske sala keteıik, budan buryn brýtsellezden saqtanýdyń joldary qandaı ekendigin jazǵan edik.
