BQO-da qyzylshamen aýyrǵandar sany 17 esege jýyq artyp ketken
ORAL. KAZINFORM — Batys Qazaqstan oblysynda bıylǵy toǵyz aıda 303 adamnyń qyzylshamen syrqattanǵany anyqtaldy.
BQO sanıtarııalyq-epıdemıologııalyq baqylaý departamenti basshysynyń orynbasary mindetin atqarýshy Mıra Qaýymbaevanyń málim etkenindeı, qyzylsha juqtyrǵandar sany óńirde aıtarlyqtaı ósken.
Mıra Nurlanqyzynyń sózine qaraǵanda, byltyr oblysta osy merzimde 18 naýqas tirkelgen edi. Osylaısha, aýrýshańdyq kórsetkishi 16,83 esege artqan.
— Bul jaǵdaı qyzylsha ınfektsııasynyń taralýyna jol bermeý jáne profılaktıkalyq sharalardy kúsheıtý qajettigin kórsetedi. Qyzylsha — aýa-tamshy joly arqyly taralatyn, juqpalylyǵy óte joǵary vırýstyq ınfektsııalyq aýrý. Aýrý, ásirese, balalar arasynda jıi kezdeskenimen, qyzylshaǵa qarsy ekpe almaǵan eresekter de juqtyrýy múmkin. Infektsııa aýyr asqynýlarǵa, sonyń ishinde ókpeniń qabynýyna, qulaqtyń qabynýyna jáne mıdyń zaqymdanýyna ákelýi yqtımal, — deıdi Mıra Qaýymbaeva.
Onyń aıtýynsha, qyzylshanyń negizgi belgileri: dene qyzýynyń kóterilýi, álsizdik, bas aýrýy, murynnan sý aǵý, jótel, kózdiń qyzarýy, jaryqqa sezimtaldyq. Sondaı-aq aýyz qýysynyń shyryshty qabatynda aqshyl daqtar paıda bolyp, bórtpe betten bastalyp, keıin búkil denege taralady.
Aýrýdyń alǵashqy belgileri baıqalǵan jaǵdaıda ózdiginen emdelýge bolmaıdy. Dereý medıtsınalyq kómekke júginip, emhanaǵa barar aldynda dárigerge telefon arqyly habarlaý qajet. Bul basqa adamdarǵa ınfektsııa juqtyrý qaýpin azaıtady.
Mamannyń naqtylaýynsha, qyzylshadan qorǵanýdyń eń tıimdi joly — vaktsınatsııa. Ulttyq profılaktıkalyq egý kúntizbesine sáıkes, qyzylshaǵa qarsy josparly vaktsınatsııa balalarǵa 12 aıynda jáne 6 jasynda júrgiziledi. Eger bala qandaı da bir sebeppen ekpeden qalyp qoısa, ata-analar tirkelgen emhanasyna habarlasyp, vaktsınatsııalaý máselesin sheshýi qajet.
— Sonymen qatar aýrýdyń aldyn alý úshin balalardyń josparly ekpelerin ýaqytyly alýyn qamtamasyz etip, ekpe mártebesin teksergen abzal. Oǵan qosa naýqas adamdarmen qarym-qatynasty shektep, qoǵamdyq oryndarda jeke gıgıena talaptaryn saqtaýmen birge bólmelerdi jıi jeldetip, ylǵaldy tazalaý jumystaryn júrgizý mańyzdy. Ata-analarǵa balalardyń profılaktıkalyq ekpelerin alýdy keıinge qaldyrmaý kerektigin eske salamyz, — dep qosty Mıra Qaýymbaeva.
Eske salaıyq, budan buryn Batys Qazaqstanda 30-dan astam adamnyń tumaýmen aýyrǵany rastalǵanyn jazǵan edik.