BQO-da qyzylshamen aýyrǵan 270-ten astam adamnyń basym bóligi ekpe almaǵan
ORAL. KAZINFORM — Batys Qazaqstan oblysynda jyl basynan beri 271 adam qyzylshamen syrqattandy.
BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, ótken jyly osy merzimde 13 adam atalmysh dertke shaldyqqan edi.
Onyń sózine qaraǵanda, óńirde juqpaly aýrýlar boıynsha epıdemıologııalyq ahýal turaqty baqylaýda bolǵanymen, qyzylshamen aýrýshańdylyqtyń óskeni baıqalady.
Qyzylsha juqtyrǵandardyń 226-sy — 14 jasqa deıingi balalar. Sondaı-aq 12-si — 15-19 jas aralyǵyndaǵy jasóspirimder, 33-i — eresekter, — dedi K.Muhıtova.
Mamannyń aıtýynsha, tirkelgen derekterdi taldaý nátıjesinde naýqastardyń basym bóligi qyzylshaǵa qarsy vaktsına almaǵany jáne egý jasyna jetpegeni anyqtaldy.
Departament turǵyndarǵa Ulttyq egý kúntizbesine sáıkes profılaktıkalyq ekpelerdi ýaqytyly alý jáne balalardyń vaktsınatsııa mártebesine jaýapkershilikpen qaraý qajettigin eske salady.
Eske sala keteıik, budan buryn Batys Qazaqstanda jyl basynan beri 256 adamnyń qyzylsha juqtyrǵanyn jazǵan bolatynbyz.
