BQO-da qystyń ishinde aýylda jaıaý júrginshi joly salynǵan
ORAL. KAZINFORM — Batys Qazaqstan oblysy Aqjaıyq aýdany ortalyǵy Chapaev aýylynda jaıaý júrginshi jolynyń sapasyz salynǵany jóninde áleýmettik jelide beınejazba jarııalandy.
Aýyl turǵynynyń Instagram áleýmettik jelisinde málim etkenindeı, Q.Maıdanov kóshesinde qystyń qaq ortasynda túnde kelip, trotýar salyp ketken.
- Mynaý masqara ǵoı, kóktemde shashylyp qalady, qalyńdyǵy 5 santımetrge jeter-jetpes etip asfalt salyp ketken. Chapaev aýylyndaǵy barlyq kóshelerge osylaı qardyń ústine ákelip salyp jatyr. Bul durys emes, aýyl turǵyndary qarsy. Ákimdik, basqa da jaýapty organdar qaıda qarap otyr? – deıdi turǵyn.
Osy máselege oraı Kazinform tilshisi Aqjaıyq aýdany ákimdigine arnaıy saýal joldaǵan edi.
Aýdan ákimi Murat Serdalınniń bergen jaýabyna qaraǵanda, Chapaev aýyldyq okrýgi ákimdigi apparaty jaıaý júrginshi jolyn salý boıynsha ótkizgen ashyq konkýrs nátıjesinde bıylǵy 14 qazanda «Qazaqstan uıymdastyrýshylar qoǵamy» qoǵamdyq birlestigi jeńimpaz bolyp tanylǵan.
2018 jyly tirkelgen atalǵan birlestik óz qyzmetin Jambyl oblysy men Shymkent qalasy aýmaǵynda atqarady.
Birlestik 11 qarashada Chapaev aýylynda M.Abdolov, Áıteke bı, Q.Maıdanov jáne Juban kóshelerinde jaıaý júrginshi jolyn salýǵa kirisken.
- 19 jeltoqsanda qolaısyz aýa raıyna baılanysty jaıaý júrginshi jolynyń qurylysy toqtatyldy. Oryndalǵan jumystar tapsyrys berýshimen qabyldanǵan joq. Sol kúni Chapaev aýyldyq okrýgi ákiminiń apparaty «Qazaqstan uıymdastyrýshylar qoǵamy» qoǵamdyq birlestigin memlekettik satyp alýdyń josyqsyz qatysýshysy dep taný jáne odan 0,1 paıyz kóleminde turaqsyz aıybyn óndirý týraly BQO mamandandyrylǵan aýdanaralyq ekonomıkalyq sotyna talap aryz berdi. Qazirgi kezde aýyl turǵyndary arasynda túsindirý jumystary júrgizilýde. Jaǵdaı baqylaýda, - dedi M.Serdalın.
Eske sala keteıik, budan buryn BQO-da jol salýshy kompanııanyń 19,7 mln teńgeni bıýdjetke qaıtarǵanyn jazǵan bolatynbyz.
