BQO-da kisi óltirgen 39 jastaǵy kúdikti ustaldy
ORAL. QazAqparat – BQO-da kisi óltirdi degen kúdikpen 39 jastaǵy turǵyn ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa Shyńǵyrlaý aýdanynda boldy.
Bıylǵy 19 qyrkúıekte Shyńǵyrlaý aýylynyń turǵyny (áıel) 1962 jylǵy baýyrynyń joǵalyp ketkeni jóninde polıtsııaǵa júgingen.
Іzdestirý jumystaryna polıtsııa qyzmetkerlerimen birge jurtshylyq ókilderi, eriktiler qatysty.
Aqyry 1 qazan kúni tártip saqshylary aýyldaǵy orman arasynan zorlyq-zombylyq belgilerimen atalǵan azamattyń múrdesin tapty.
Osy oqıǵa boıynsha QR QK 99-baby 1-bóligine sáıkes (kisi óltirý) qylmystyq is qozǵalyp, Shyńǵyrlaý aýdandyq polıtsııa bóliminiń jeke quramy aıaǵynan tik turdy.
Sonyń nátıjesinde 3 qazan kúni kúdikti anyqtalyp, QR Qylmystyq is júrgizý kodeksi 128-babyna sáıkes ýaqytsha oqshaýlaý ızolıatoryna jatqyzyldy. Bir kúnnen keıin ol Shyńǵyrlaý aýdandyq sotymen tutqyndaldy.
Kúdikti jumys jasamaıtyn, buryn sottalmaǵan osy aýdannyń 1980 jylǵy turǵyny bolyp shyqty.
Qazirgi kezde birqatar saraptama taǵaıyndalyp, tergeý amaldary júrgizilýde.
Eske sala keteıik, budan buryn BQO-da orman arasynan er adamnyń múrdesi tabylǵanyn jazǵan bolatynbyz.
