BQO-da kisi ólimine soqtyrǵan eki jol oqıǵasy tergelýde
ORAL. QazAqparat - Batys Qazaqstan oblysynda kisi ólimine soqtyrǵan eki jol-kólik oqıǵasy tergelýde, dep habarlaıdy QazAqparat tilshisi.
BQO ishki ister departamentiniń baspasóz qyzmetinen túsken málimetke qaraǵanda, 29 mamyr kúni saǵat 02.20-da «VAZ-2170» avtokóligi Oraldaǵy Eýrazııa kóshesimen kele jatyp, «Sıtı tsentr» saýda ortalyǵyna qarsy bettegi elektr baǵanyna soǵylǵan. Qatty soqqydan avtokólik aýdaryldy. 1997 jylǵy júrgizýshi jedel járdem brıgadasy kelgenge deıin oqıǵa ornynda kóz jumǵan.
Sol kúni saǵat 09.20 shamasynda «Oral-Atyraý» jolynyń 240-shaqyrymynda 1975 jylǵy Ózbekstan azamaty «Chevrolet Orlando» kóliginiń rýline ıe bola almaı, qarsy betke shyǵyp ketip, «KamAZ» júk kóligine soǵylǵan. Saldarynan «Chevrolet Orlando» avtokóliginde otyrǵan ózbekstandyq jolaýshy aýyr jaraqattan kóz jumǵan.
Qazirgi kezde eki oqıǵa boıynsha da QR QK-niń 345-baby 3-bóligine sáıkes (abaısyzda kisi ólimine soqtyrǵan jol qozǵalysy erejesin buzý) ishki ister organdary sotqa deıingi tergeý amaldaryn júrgizýde.
