BQO-da qys ishinde jolǵa asfalt tóselip jatyr – ákimdik jaýap berdi

ORAL. KAZINFORM – Áleýmettik jelide qystyń ishinde Terekti aýdanynda Pokatılov – ıAık baǵytyndaǵy jolǵa asfalt tóselip jatyrǵany jóninde beınejazba tarady.

BQO ákimdiginen túsken málimetke qaraǵanda, Pokatılov aýylyna kireberis joldy «Anýsh-Qurylys» JShS 2023 jyly bastaǵan.

Pokatılovtan ıAık aýylyna deıin 9 km jolǵa asfalt tóselgen.

 — 2024 jylǵa aýysqan nysanda túpkilikti jumys merzimi 11 qarashada aıaqtalýy tıis edi. Alaıda merdiger qurylys-montaj jumystaryn ýaqytyly bitirmegen. Osyǵan baılanysty Terekti aýdany turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi merdigerden oryndalmaǵan mindetteme somasynan merzimi ótken ár kún úshin 0,1 paıyz kóleminde turaqsyzdyq aıybyn óndirý jáne «Anýsh-Qurylys» JShS-ny josyqsyz qatysýshy retinde taný týraly sotqa talap aryz berdi. Beınejazba qalǵan 3 km jolǵa asfalttyń ekinshi qabatyn tóseý kezinde túsirilgen — dep habarlady vedomstvodan.

Terekti aýdanynyń ákimi Álııa Muhanbetjanova BQO aýdanaralyq ekonomıkalyq sotyna talap aryzdyń 15 qarasha kúni berilgenin jetkizdi.

 — Merdiger mekeme talap aryz sotqa berilgennen keıin aqtalǵysy kelgen bolar, asfalttyń ekinshi qabatyn 4 jeltoqsan kúni tósegen. Bir kúnnen keıin ózim basynda boldym. Barlyq jumys toqtatyldy, — dedi Kazinform tilshisine Á.Muhanbetjanova.

Eske sala keteıik, budan buryn Oralda topyraq ústine asfalt salynyp jatqanyn jazǵan bolatynbyz.