BQO-da Kırov-Shejin sý arnasy kúrdeli jóndelýde
ORAL. QazAqparat - Batys Qazaqstan oblysyndaǵy Kırov-Shejin sý arnasyn kúrdeli jóndeýdiń ekinshi kezeńin aıaqtaýǵa aldaǵy ýaqytta respýblıkalyq bıýdjetten 600 mln. teńge bólinedi.
Bul týraly atalǵan arnany kúrdeli jóndeý barysymen tanysqan oblys ákimi Altaı Kólginov málim etti.
Óńir basshysynyń aıtýynsha, qazirgi kezde úshinshi kezeń boıynsha Kırov-Shejin sý arnasynyń 54 shaqyrymyn jóndeý úshin de jobalyq-smetalyq qujattama daıyndalýda. Eger qajetti qarajat bólingen jaǵdaıda bul jumys aldaǵy jyly bastalyp, 18 shaqyrym sý arnasy jańadan qazylady. Basty maqsat - osy arna arqyly Jaıyq ózeniniń sýyn Qaraózenge jetkizý. Sonda Reseıdegi Edil ózeninen bosatylatyn 100 mln.tekshe metr sýǵa jumsalatyn qarjydan 30 mln. tekshe metr sýdyń quny únemdeledi. Oǵan qosa tórt birdeı aýdannyń aýmaǵyn qamtıtyn 133 myń ga sýarmaly jer paıda bolyp, sharýa qojalyqtarynyń tynysy keńeıedi. Bul óz kezeginde jańa jumys oryndarynyń ashylýyna múmkindik beredi.
Jalpy, Aqjaıyq aýdany Alǵabas aýyldyq okrýginde ornalasqan Kırov sý qoımasynyń bul tarmaǵy 180 shaqyrymnan asady. «Qazsýshar» RMK BQO fılıalynyń dırektory Nurbolat Jumaǵalıevtiń sózine qaraǵanda, atalmysh sý arnasynyń bastapqy 55 shaqyrym bóligin jóndeý aldaǵy qazan aıaǵynda bitedi. Sonymen birge ekinshi kezeńge jatatyn 74 shaqyrym bóligin «Qazsýshar» RMK BQO fılıaly, «Ýralskvodstroı» AQ, «Azııatehstroı» JShS jóndeýdi qolǵa aldy. Ekinshi kezeńge qaralǵan 854 mln. teńgeniń kúni búgin 120 mln. teńgesi ıgerilgen.
Eske sala keteıik, óńirdiń Jańaqala, Qaztalov, Jánibek, Bókeı ordasy syndy ońtústik aýdandary sý tapshylyǵyn únemi sezinip keledi. Bul kókeıkesti máseleni sheshý úshin oblys Reseıden sý satyp alýǵa májbúr bolyp otyr. Kırov-Shejin arnasyn tartý - osy máseleni sheshýdiń bir joly.
