BQO-da Kırov-Shejin arnasyn qalpyna keltirý jumystary jalǵasýda
ORAL. QazAqparat - Batys Qazaqstan oblysynda Kırov-Shejin arnasyn qalpyna keltirý jumystary jalǵasýda, dep habarlaıdy «QazAqparat» tilshisi.
BQO ákimdiginen túsken málimetke qaraǵanda, arnany qaıta jańǵyrtýdaǵy maqsat - óńirge Reseı Federatsııasynan sanıtarlyq-ekologııalyq maqsattarǵa kelisim-shart negizinde alynatyn Edil sýyna táýeldilikti azaıtý, sonymen qatar 50 myńnan astam turǵyny, 918 myń bas maly bar jáne aýyz sýmen qamtamasyz etetin 14 jergilikti sý tazartý ǵımaraty jumys istep turǵan Aqjaıyq, Tasqala, Qaztalov jáne Jańaqala aýdandarynyń eldi mekenderin turaqty sýmen qamtý úshin Qaraózenge sý jetkizý.
Atalǵan jobany júzege asyrý jyl saıyn Jaıyqtan Qaraózenge 50 mln tekshe metr kóleminde sý aıdaýǵa, bul óz kezeginde jylyna 600-700 mln teńge bıýdjet qarajatyn únemdeýge múmkindik beredi.
Batys Qazaqstan oblysyna Reseı Federatsııasynan 75-80 mln tekshe metr kólemde Edil sýyn alý úshin jyl saıyn respýblıkalyq bıýdjetten 1,1-1,2 mlrd teńge bólinedi.
Oblys ákimi Altaı Kólginovtiń sózine qaraǵanda, Kırov-Shejin arnasyn qalpyna keltirýdiń buǵan deıin 1-inshi jáne 2-inshi kezeńderi (130 shaqyrym) bitse, bıyl 3-inshi kezeńi (49,4 shaqyrym) aıaqtalady. Sonda kelesi jylǵa tek 4-inshi kezeń - Kóshim ózeninde sorǵy stansasyn ornatý ǵana qalady.
Kırov-Shejin arnasyn bitirgennen keıin Aznabaı-Taıpaq jobasy bastalady. Budan bólek 2017-2020 jyldary Dóńgeleksaı jyrasyndaǵy, Shyńǵyrlaý ózenindegi (Masaıtóbe aýyly), Saryózendegi (Seksenbaı eldi mekeni) úsh birdeı jańa sý qoımasyn salý, sondaı-aq Óleńti ózenindegi «Aıaq» sý qoımasyn qaıta qalpyna keltirý jumystaryn respýblıkalyq bıýdjetten qarjylandyrý úshin (2,6 mlrd teńge) suranys joldandy.
Aıta keteıik, aldaǵy bes jylda kózdelgen qurylys nysandary iske qosylsa, bul sýarmaly jer kólemin 145 myń gektarǵa deıin jetkizýge múmkindik beredi.
