BQO-da qylmystyq toptan 1,5 tonna bekire balyǵy tárkilendi

Batys Qazaqstan oblysynda bekire tuqymdas balyqtardy satýmen aınalysqan qylmystyq top quryqtaldy, dep habarlaıdy Kazinform.

BQO Polıtsııa departamentiniń baspasóz qyzmetinen málim etkenindeı, uıymdasqan qylmysqa qarsy kúres basqarmasynyń qyzmetkerleri Oral qalasynda bekire balyǵy men onyń ýyldyryǵyn zańsyz satýmen aınalysqan qylmystyq topty anyqtady. Olar balyq ónimderin jalǵan qujattarmen qaladaǵy ortalyq bazarlarǵa ákelip satqan.

«Polıtsııa qyzmetkerleri jedel izdestirý is-sharalary barysynda 1520,55 keli bekire balyǵy, 27,3 keli qyzyl jáne 1,25 keli qara ýyldyryq, sondaı-aq jalpy somasy 2 mln 705 myń teńge jáne 35,8 myń rýbl qarajatyn, oǵan qosa tapansha, oq-dáriler, elektrondy tarazy, pyshaq, dúrbini taýyp, tárkiledi.

Ustalǵandar BQO turǵyndary bolyp shyqty. Atalǵan derek boıynsha QR Qylmystyq kodeksiniń 339-baby 2-bóligine (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes sotqa deıingi tergeý amaldary júrgizilip jatyr», – dep habarlady vedomstvodan.