BQO-da kıik batyp ólgen ózen sýy ishýge jaramdy ma

ORAL. KAZINFORM — Batys Qazaqstan oblysy Kaztalov aýdany aýmaǵynda Saryózennen kıik ólekseleri shyǵarylǵan edi.

Osyǵan oraı Kazinform tilshisi BQO sanıtarııalyq-epıdemıologııalyq baqylaý departamentine saýal joldady.

Departamentten túsken málimetke qaraǵanda, atalmysh oqıǵa oryn alǵannan keıin jergilikti sanıtarııalyq-epıdemıologııalyq baqylaý basqarmasy mamandary asa qaýipti aýrýlar, vırýsologııalyq jáne radıologııalyq kórsetkishterge qatysty Saryózennen zertteýge sý synamasyn dereý alǵan.

— Zerthanalyq zertteý nátıjesi boıynsha sáıkessizdik ańyqtalmady. Qazirgi kezde turǵyndar arasynda ishek aýrýlary, asa qaýipti ınfektsııalardyń aldyn alý boıynsha sanıtarlyq-aǵartý jumystary júrip jatyr, — dep habarlady vedomstvodan. 

Foto: «Bókeıorda» tabıǵı rezervaty

Kaztalov aýdany ákimdiginen málim etkendeı, búgingi tańda Bostandyq (adam sany — 1 369), Qarakól (142), Kókterek (921), Juldyz (587) jáne Qonys (313) eldi mekenderiniń halqy Saryózennen sý alyp otyr. 

— Bıylǵy 30 mamyrda kıikterdiń sýǵa ketkeni jóninde málimet tirkeldi. Osyǵan oraı turǵyndar paıdalanyp otyrǵan ózenniń lastanýyna jol bermeý, sýdyń sapasyn qalpyna keltirý maqsatynda arnaıy sanıtarlyq normalarǵa saı tazartý dezınfektsııa jumystary júrgizildi, — delingen aýdan ákimdiginen kelgen jaýapta.

Foto: jergilikti turǵyndardan

Eske sala keteıik, budan buryn Batys Qazaqstanda sýǵa batqan 560-tan astam kıik óleksesi joıylǵanyn jazǵan bolatynbyz.

Keıin ózennen 300-den astam kıik óleksesi shyǵaryldy.