BQO-da kıik aýlaýshylardyń ishek-qaryndy dalaǵa laqtyryp ketkeni ras pa
ORAL. KAZINFORM – Batys Qazaqstan oblysy Tasqala aýdanynda kıik sanyn retteý kezinde aýlanǵan janýardyń ishek-qarny dalada jınalmaı jatqany jóninde áleýmettik jelide beınejazba tarady.
Jergilikti turǵyndardyń sózine qaraǵanda, oqıǵa 13 shilde kúni Tasqala aýdany Aqtaý jáne Atameken aýyldyq okrýgteri arasynda tańǵy mezgilde bolǵan.
Beınejazbada kıik soıylǵannan keıin ishek-qarny dalada jatqany, munyń qorshaǵan ortany lastaıtyny týraly aıtylady.
«Ohotzooprom» ÓB» RMQK óńirlik fılıalynyń dırektory Arman Qojahmetov kıik aýlanǵannan keıin ishek-qarny sol boıda jınalatynyn jetkizdi.
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń naqtylaýynsha, bul ishek-qaryndar túngi aýlaýdan keıin tańda bir saǵattyń ishinde jınalǵan.
– Sol ýaqyt arasynda jergilikti malshy túsirip úlgergen. Batys Qazaqstan oblysynda kıik sanyn retteý jumysy bastalǵannan beri 830 bas aqbóken aýlandy, - dedi N.Rahymjanov.
Tasqala aýdany Aqtaý aýyldyq okrýginiń ákimi Baýyrjan Imashev keshe «Ohotzooprom» ÓB» ınspektorlarymen birge aralaǵanyn, ishek-qarynnyń dalada jatqanyn kórmegenin aıtty.
– Búgin tarap jatqan beınejazba boıynsha «Ohotzooprom» mekemesimen birge jumystanatyn bolamyz, - dedi B.Imashev.
«Ohotzooprom» mekemesiniń qyzmetkerleri atalǵan aýmaqtyń kıiktiń ishek-qarnynan tolyqtaı tazartylǵanyn habarlady.
Eske sala keteıik, budan buryn Batys Qazaqstanda kıik sanyn retteý jumysy qalaı júrgizilip jatqanyn jazǵan edik.