BQO-da kıikti zańsyz aýlaýdan memleketke 1,1 mlrd teńge zalal keldi
ORAL. QazAqparat - Batys Qazaqstan oblysynda kıikti zańsyz aýlaýdan memleketke 1,1 mlrd teńge zalal keldi. Bul týraly óńirlik kommýnıkatsııalar qyzmetinde ótken brıfıngte aıtyldy, dep habarlaıdy QazAqparat tilshisi.
Oblys prokýrorynyń aǵa kómekshisi Baýyrjan Ahmetjanovtyń aıtýynsha, sonyń tek 12 mln teńgesi ǵana óndirildi.
Prokýrorlyq qadaǵalaý aktileriniń negizinde sot oryndaýshylary 13 avtokólikke jáne 15 jyljymaıtyn múlikke tyıym saldy.
Sot aktilerin májbúrlep óndirý baǵytynda sharalar qolǵa alynǵan.
Óńirde kıikti zańsyz aýlaǵany jáne olardyń derıvattarymen zańsyz aınalysqany úshin 2017-2018 jyly 88 adam sottaldy. Sonyń jeteýi bas bostandyǵynan aıyryldy. 79 adamnyń bas bostandyǵy shekteldi. Eki adamǵa aıyppul salyndy.
Brakonerlerden 616 kıik ushasy, 955 múıiz alynyp, 25 myltyq, 1205 oq-dári, 18 pyshaq pen 19 ara joıyldy.
Memleket paıdasyna 14 avtokólik, 3 qarshana men 1 kvadrotsıkl tárkilendi.
«Prokýratýranyń nusqaýyna sáıkes ádilet departamenti «Atqarýshylyq óndiris jáne sot oryndaýshylarynyń mártebesi týraly» QR Zańynyń 55-babyna sáıkes qazirgi kezde tyıym salynǵan múlikti baǵalaý jáne satý sharalaryn júrgizýde», - dedi Baýyrjan Zákıuly.
Aýyl sharýashylyǵy mınıstriniń buıryǵyna sáıkes bir kıiktiń quny 3,7 mln teńge kóleminde belgilendi.
Kıikti zańsyz aýlaǵany jáne derıvattarymen zańsyz aınalysqany úshin QR QK 337 jáne 339-babyna sáıkes aıypty dep tanylǵan adam jeti jylǵa deıin bas bostandyǵynan aıyrylady.
Brıfıngke qatysqan oblystyq Orman sharýashylyǵy jáne janýarlar dúnıesi aýmaqtyq ınspektsııasy basshysynyń orynbasary Zákárııa Turalıevtiń sózine qaraǵanda, Qazaqstanda kıikter úsh aımaqta keńinen taralǵan.
Áýeden sanaý jolymen ótken jyly Betpaqdalada 76 400 kıik tirkelse, Ústirtte 3 700, Oral popýlıatsııasynda 135 myńǵa jetken. Bul óńirde kıikterdiń sany jylma-jyl ósip kele jatqanyn kórsetedi.
«Bıyl qysta qardyń kóptiginen kıikter kórshiles Atyraý oblysyna aýdy. Soǵan oraı Atyraýda kıikti zańsyz atý deregi tirkeldi, qazir tergeý amaldary júrgizilýde. Kóktem kelisimen kıikter qaıtyp oralýda. Aldaǵy mamyr aıynda olar tóldeıdi. Kıik sanaǵy bıyl da júrgiziledi», dedi Z.Turalıev.
QR AShM Orman sharýashylyǵy jáne janýarlar dúnıesi komıtetine qarasty «Ohotzooprom» ÓB» RMQK-nyń óńirdegi fılıalynda 50 ınspektor alty aýdandy qamtıtyn 4 mln astam aýmaqta kıik qorǵaýmen aınalysady.
Bir aıta ketetin jaıt, Oral popýlıatsııasyna jatatyn kıikter kórshiles Reseıdiń Saratov, Volgograd oblystarynyń shekaralas aýdandarynda da jaıylyp, órisin keńeıtýde. Osyǵan oraı Saratov, Volgograd oblysynyń ekologııa jáne orman sharýashylyǵy, tabıǵı resýrstar mekemelerimen birlesken jumystar jasalýda.
