BQO-da kıikti zańsyz aýlaý qylmysy bes esege ósip ketti
ORAL. QazAqparat - Batys Qazaqstan oblysynda kıikterdi zańsyz aýlaý men olardyń derıvattaryn alý boıynsha quqyqbuzýshylyq 2016 jyly (19 derek) 2014 jylmen (4 derek) salystyrǵanda, bes esege ósken. Bul týraly búgin Oral tabıǵat qorǵaý prokýrorynyń mindetin atqarýshy Dáýren Tájiǵalıev málim etti, dep habarlaıdy «QazAqparat» HAA tilshisi.
Onyń aıtýynsha, sol mezgilde kıiktiń ushasyn alý 4 esege (35-ten 151-ge deıin), múıizin alý 7 esege (70-ten 530-ǵa deıin) kóbeıip ketip otyr. Tek bıylǵy eki aıdyń ózinde 40 kıiktiń ushasy men 176 múıizi alynǵany anyqtaldy.
Sońǵy jylda 248 kıik ushasy, 1117 múıizi alynǵan. Sonsha múıizdi alý úshin 558 kıik atylýy qajet bolsa, qalǵan 337 ushanyń qaıda ketkeni belgisiz. Kıik mekendemeıtin Oral qalasy men Zelenov aýdanynyń ózinde 2015-2016 jyldary 551 múıiz tárkilengen. Bul brakonerlerdiń kıikti atyp alyp, oblystyń bes aýdany arqyly múıizdi esh kedergisiz Oralǵa deıin tasymaldaǵandyǵyn kórsetedi. Mysaly, 2015 jyly 31 shildede Oral qalasyna qarasty Jelaev kentinde Almaty oblysynyń turǵyny A.Jantóreev ustalyp, onyń avtokóliginen 149 dana kıiktiń múıizi tabyldy. Ol keıin sottaldy. Sol sekildi ótken jyly 14 qazanda «Ohotzooprom» óndiristik birlestigi qyzmetkerleri Bókeı ordasy aýdanynda aýdandyq ishki ister bóliminiń ýchaskelik ınspektory D.Áshimovti qolǵa túsirgende, onyń avtokóliginen kıiktiń 14 múıizi men 9 ushasy shyqty. Oǵan qatysty qylmystyq is sotta qaralýda. Bul ishki ister organdary qyzmetkerleriniń de taza emestigin kórsetedi. A.Jantóreevke qatysty qylmystyq isti teksergen kezde tergeýshi D.Muqanovtyń da qylmysy áshkerelendi. Ol A.Jantóreevtiń avtokóligin qaraý kezinde hattamaǵa 149-dyń ornyna 49 kıik múıizi tabylǵandyǵy jónindegi derekti burmalap kórsetken. Sol úshin D.Muqanovtyń sot úkimimen 2 jyl 6 aıǵa bas bostandyǵy shektelip, polıtsııa maıory sheninen aıyryldy.
Qazirgi ýaqytta oblys prokýratýrasynyń bastamasymen «Kıik qorǵaý» jobasy júzege asyrylýda. Prokýratýra usynysyna sáıkes «Ohotzooprom» óndiristik birlestigi Oral fılıalyna ótimdiligi joǵary 5 kólik quraly, 8 qarshana berildi. Kúni búgin Jańaqala, Aqjaıyq, Qaztalov jáne Bókeı ordasy aýdandarynda 52 ınspektor, 22 avtokólik, 3 KÝNG júk kóligi, 9 qarshana, 1 tikushaq kıik qorǵaýǵa jumyldyrylǵan.
Eske sala keteıik, oblys aýmaǵynda 70 myńnan astam kıik bar dep eseptelinedi, bul - respýblıkadaǵy barlyq kıik sanynyń 70 paıyzy.
