BQO-da kıikti zańsyz aýlaý derekteri azaımaı otyr

BQO ishki ister departamenti jergilikti polıtsııa qyzmeti tabıǵatty qorǵaý bóliminiń bastyǵy, polıtsııa maıory Elaman Valıevtiń aıtýynsha, jyl basynan beri jedel tergeý toptarynyń kómegimen júrgizilgen is-sharalar nátıjesinde 3 zańsyz kıik aýlaý deregi anyqtalyp, tergeý amaldary júrgizilýde. Sonyń bireýi Bókeı ordasy, ekinshisi Jańaqalada tirkelse, Qaztalov aýdanynda 150 dana kıik múıizin alyp ótpekshi bolǵandardyń joly kesildi. Oǵan qosa Jańaqala aýdanynda qabandy zańsyz aýlaýdyń jáne bir deregi belgili boldy.

Ótken jyly oblysta kıikti zańsyz aýlaý boıynsha 22 brakonerlik deregi tirkelip, sonyń 11-i ashyldy, qalǵandary boıynsha tergeý júrgizilýde. 7 is sotqa deıin jetti.

«Ókinishke qaraı, kıikti zańsyz aýlaýǵa qatysty nemese brakonerlerge járdemdesý deregi polıtsııa men «Ohotzooprom» qyzmetkerleri arasynda da kezdesýde. Ótken jyly Bókeı ordasy aýdany Saraljyn aýylynda ýchaskelik polıtsııa ınspektorynyń osyǵan qatysy anyqtalyp, qazir tergeý júrgizilýde. Eger sotta dáleldense, zańdy túrde jaýapqa tartylatyn bolady. Sol sııaqty «Ohotzooprom» qyzmetkerine qatysty taǵy bir derek boıynsha tergeý amaldary júrgizilýde», dedi «QazAqparat» tilshisine E.Valıev.

Eske sala keteıik, oblys aýmaǵynda ótken jyly 70,2 myńnan astam kıik sanaqqa ilikken bolatyn, bul respýblıkadaǵy barlyq kıik sanynyń 70 paıyzyn quraıdy. Bıyl qystyń jaısyz bolýyna baılanysty kıik Bókeı ordasy, Jańaqala aýdandaryna, ıaǵnı qumǵa qaraı kóshti.

QR AShM Orman sharýashylyǵy jáne janýarlar dúnıesi komıteti oblystyq ınspektsııasynyń basshysy Qaırat Qadeshevtiń sózine qaraǵanda, atalǵan mekeme «Ohotzooprom» óndiristik fılıaly qyzmetkerlerimen birlese otyryp, qazir negizinen Hakı, Aralsor, Naryn qumynda júrgen kıikterdi qadaǵalaýda. Bıylǵy qystyń qattylyǵynan kıik qatty álsiregen. Olardyń kóktemgi jaı-kúıi, tóldeýi qalaı bolady, sol da alańdatýda.

 Taǵy bir aıta ketetin jaıt, kıik sońǵy jyldary kóbeıgenimen, olardy baqylaıtyn shtat sany burynǵy kúıinde qalyp otyr.