BQO-da kıikti zańsyz aýlaǵandardan 331 mln teńge óndirildi
ORAL. QazAqparat - Batys Qazaqstan oblysynda kıikti zańsyz aýlaǵandardan memleket paıdasyna 331 mln teńge óndirildi, dep habarlaıdy QazAqparat tilshisi.
BQO prokýratýrasynyń baspasóz qyzmetinen túsken málimetke qaraǵanda, bıyl brakonerlikpen aınalysqan 21 adam ustalyp, segiz derek boıynsha sot úkimderi shyqty.
Brakonerler 99 bas kıiktiń kózin joıǵan. Olardan birneshe ańshylyq qarý, 6 qarshana men kólik tárkilendi.
Barlyq derekter prokýratýra organdary tarapynan muqııat qadaǵalanyp, jazadan bultartpaý qaǵıdasy saqtaldy.
Atap aıtqanda, Aqjaıyq aýdandyq sotynyń úkimimen QR 337-baby (zańsyz ańshylyq) jáne 339-babyna (sırek kezdesetin janýarlarmen zańsyz aınalysqany úshin) sáıkes Taıpaq aýylynyń eki turǵyny aıypty dep tanylyp, úsh jylǵa bas bostandyqtarynan aıyryldy. Sot úkimi zańdy kúshine endi. Bul ekeýinen 74 bas kıikti joıǵany úshin 246 mln teńge zalal óndirildi.
