BQO-da kıikter men sharýalar máselesi qalaı sheshiledi
NUR-SULTAN. QazAqparat – Batys Qazaqstan oblysynyń ákimi Ǵalı Esqalıev «jaıylymdardy kıik basyp aldy» dep shaǵymdanǵan fermerler máselesi qalaı sheshiletinin aıtty, dep habarlaıdy QazAqparat.
Buǵan deıin áleýmettik jelide sharýalar mal jaıylymyna arnalǵan jerlerdi kıik basyp jatyr degen vıdeo taratty.
«Bul bir ǵana Jánibek aýdanynyń problemasy emes, munda tórt aýdan bar. Jaqynda Ekologııa mınıstri Maǵzum Myrzaǵalıev Prezıdenttiń tapsyrmasy boıynsha keldi. Biz sheshim qabyldap, jergilikti halyqpen, fermerlermen, ǵalymdarmen talqylaý júrgizdik. Qazir jasaýǵa bolatyn sheshimder bar jáne ǵylymı zertteýlerdi, taldaýdy qajet etetin sheshimder bar. Bıyl jalpy aýdany 650 myń gektarǵa jýyq rezervat pen qaýmal quramyz degen Prezıdent Ákimshiliginiń kelisimi bar. Biraq bul barlyq máseleni sheshpeıdi, bul máseleni birtindep retteı bastaımyz. Kıiktiń qozǵalysyn retteıtin 78 ınspektor bolady», - dep jaýap berdi ákim Ortalyq kommýnıkatsııalar qyzmetinde ótken brıfıngte.
Onyń aıtýynsha, máseleni jergilikti jerde mamandar men ǵalymdar zerttep jatyr jáne arnaıy jumys toby quryldy.
«Sýdyń joqtyǵynan kıikter ketken jerderdi, alańdardy sýlandyrý kerek. Qazir biz sýdy zerttep jatyrmyz. Jaıylymdar boıynsha Jaıyqtyń sol jaǵasynda úlken rezervter bar. Biz qazir qosymsha jaıylym jerlerin aınalymǵa engizýge múmkindik beretin úsh arnany rekonstrýktsııalaýdy bastaımyz. Onda jabaıy janýarlardy kóshirý qıyn bolýy múmkin, biraq bul jumystardy ǵalymdardyń kómegimen jasaımyz. Bul fermerlerge ózderine qosymsha jaıylym alýǵa múmkindik beredi. Prezıdenttiń kıik pen sharýa qojalyqtary malyna qatysty ymyraǵa kelý týraly tapsyrmasy bar. Biz tepe-teńdikti izdeımiz», - dedi Ǵalı Esqalıev.
