BQO-da kıik múıizderin áketip bara jatqan eki adam ustaldy
ORAL. QazAqparat - Batys Qazaqstan oblysynda qos turǵyn kıik múıizderimen ustaldy, dep habarlaıdy QazAqparat tilshisi.
Oqıǵa búgin Qaztalov aýdany aýmaǵynda oryn aldy. Aýdandyq polıtsııa bóliminiń ınspektory Mırjan Tileýbaevtyń aıtýynsha, polıtseıler 10 sáýir kúni saǵat 07.30 shamasynda Birik aýyldyq okrýgine qarasty «Qalabaı» qystaǵynyń mańynda «Nıva Shevrole» avtokóligin toqtatqan.
Tekserý kezinde 2 adam mingen kólikten 10 dana kıik múıizi, bir-birden pyshaq pen ara, 2 qarý jáne oq-dári tabyldy.
«Oqıǵa ornynda polıtsııa qyzmetkerleri jumys jasap, qazirgi kezde tergeý amaldary júrip jatyr», - dedi QazAqparat tilshisine M.Tileýbaev.
Oblystyq polıtsııa departamentiniń baspasóz qyzmeti naqtylaǵandaı, avtokólik salonynda Qaztalov aýdanynyń turǵyny men «Ohotzooprom» RMQK ınspektory bolǵan. Qazirgi kezde QR QK 337-baby (zańsyz ańshylyq) jáne 339-babyna (kıiktiń bólikterimen nemese derıvattarymen zańsyz aınalysý) sáıkes sotqa deıingi tergeý amaldary júrip jatyr.
Oblys aýmaǵynda 1-30 sáýir aralyǵynda ótip jatqan «Kıik» jedel aldyn alý sharasy barysynda aýdandyq polıtsııa bólimi «Ohotzooprom» mekemesi qyzmetkerlerimen birlesken jumystardy jalǵastyryp jatyr.
Eske sala keteıik, budan buryn BQO-da kıikti zańsyz aýlaýdan memleketke 1,1 mlrd teńge zalal kelgenin jazǵan bolatynbyz.
