BQO-da kıik aýlaýmen aınalysqan uıymdasqan top músheleri qolǵa tústi
ORAL. QazAqparat - 19 maýsym kúni Qaztalov aýdanynda kıik aýlaýmen zańsyz aınalysqan uıymdasqan top músheleri qolǵa tústi. Bul týraly BQO ІІD tergeý basqarmasy tergeý bóliminiń bastyǵy, polıtsııa podpolkovnıgi Mahambet Temirbaev málim etti, dep habarlaıdy «QazAqparat» tilshisi.
Onyń aıtýynsha, keń aýqymdy jedel izdestirý sharalary barysynda 272 dana kıik múıizi, 1 mln. 120 myń teńge aqsha, 5 dana ańshy qarýy, 1 gazdy tapansha, 134 dana oq-dári, 4 qarshana, 5 jol talǵamaıtyn avtokólik, 18 uıaly telefon tárkilendi. Qylmys aıǵaqtary tabylǵan eki kúdikti Qaztalov aýdandyq ishki ister bóliminiń ýaqytsha oqshaýlaý ızolıatoryna qamaldy. Qalǵan úsheýiniń qylmysqa qatystylyǵy tekserilýde.
Qazirgi kezde kıikti zańsyz aýlaýǵa baılanysty tergeý amaldary júrgizilýde.
Aıta keteıik, óńirde kıikti zańsyz aýlaý qylmysy azaıar emes. Aıtalyq, ótken jyly 24 qylmystyq is óndiriste bolsa, bıyl jyl basynan beri 13 sondaı istiń tórteýi sotqa jiberildi. Beseýi qylmystyq jaýapkershilikke tartatyn adam anyqtalmaǵandyqtan, toqtatyldy.
