BQO-da kıik atqandardan memleket paıdasyna 10,8 mln teńge óndirildi
ORAL. QazAqparat – Batys Qazaqstan oblysynda kıik atqandardan memleket paıdasyna 10,8 mln teńge óndirildi, dep habarlaıdy QazAqparat tilshisi.
BQO prokýratýrasynyń baspasóz qyzmetinen túsken málimetke qaraǵanda, S.A. jáne J.A. degen azamattar ótken jyldyń 22 naýryzynda Bókeı ordasy aýdany Muratsaı aýyldyq okrýgi «Álem» qystaǵynyń mańynda «Escudo Bombardier» qarshanasymen qýyp júrip, 3 bas kıikti atyp óltirip, múıizderin kesip alǵan.
Jánibek aýdandyq sotynyń 2018 jylǵy 20 maýsymdaǵy úkimimen atalǵan turǵyndar QR QK 337-baby (zańsyz ańshylyq) jáne 339-babyna (janýarlardyq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes aıypty dep tanylyp, 3 jyl 6 aıǵa bas bostandyqtary shektelip, olardan memleket paıdasyna 10,8 mln teńge óndirilgen.
Alaıda sottalǵandar osy ýaqytqa deıin sonyń tek 531 myń teńgesin ǵana tólegen.
Prokýrorlar atqarýshy qujatty tekserip, aqparattyq júıeler arqyly boryshkerlerdiń menshiginde jer telimi, úıi men avtokóliginen basqa 175 iri qarasy men 55 bas jylqysy bar ekendigin anyqtady.
Jánibek aýdany prokýratýrasynyń usynymy nátıjesinde «Atqarýshylyq is júrgizý jáne sot oryndaýshylarynyń mártebesi týraly» Zańynyń 32, 66-baptarynyń tártibimen sot oryndaýshy múliktiń tizimdemesin jasap, olardyń barlyǵyna tyıym saldy.
Anyqtalǵan múlikti saýda-sattyqqa shyǵarý týraly habarlama berilgennen keıin boryshkerler qalǵan somany tolyǵymen ótedi.
Aıta keteıik, bıylǵy 23 maýsymda osy aýdanda Aqoba aýylynyń A. degen turǵyny «Adaıbaı» sý bógetine velosıpedpen baryp, «IJ-54» myltyǵymen sý ishýge kelgen kıiktiń úsh tekesi men bir analyǵyn atyp alyp, memleketke 14 mln teńge zalal keltirgen.
Bul qylmystyq is te aýdandyq sotta qaralyp, QR QK 339-babyna sáıkes A. aıypty dep tanylyp, 1 jyl 6 aı merzimge bas bostandyǵy shekteldi. Oǵan qosa 14 mln teńge memleket paıdasyna óndirildi. Bul sot aktisi zańdy kúshine engen joq.
