BQO-da kıeli oryndar tizimine alty nysan engizý kózdelýde

ORAL. QazAqparat - Batys Qazaqstan oblysynda Elbasynyń «Rýhanı jańǵyrý» baǵdarlamasy aıasynda «Qazaqstannyń kıeli jerleriniń geografııasy» jobasy boıynsha Qazaqstannyń jalpyulttyq kıeli oryndary qataryna kiretin 100 nysannyń tizimine Batys Qazaqstan oblysynan 6 nysan engizý kózdelýde. Bul týraly oblys ákimi, partııa fılıalynyń tóraǵasy Altaı Kólginovtiń tóraǵalyǵymen ótken «Nur Otan» partııasy oblystyq fılıalynyń kezekten tys HHІ konferentsııasynda aıtyldy, dep habarlaıdy «QazAqparat» tilshisi.

Partııa fılıaly tóraǵasynyń birinshi orynbasary Serik Súleımenniń málim etkenindeı, olar: birinshi - ortaǵasyrlyq Jaıyq qalashyǵy; ekinshi - Bókeı ordasy tarıhı-mýzeı kesheni; úshinshi - Terekti aýdanyndaǵy Taqsaı qorǵan kesheni; tórtinshi - Batys Qazaqstan óńirinde «Dádem ata» degen atpen áıgili Jumaǵazy haziret zıraty; besinshi - belgili aqyn, oıshyl-aǵartýshy, Alash qaıratkeri Ǵumar Qarash zıraty; altynshy - Alashorda úkimetiniń batys qanaty - Kúnbatys Alashordasynyń ortalyǵy bolǵan Jympıty aýylynda Alash tarıhymen baılanysty birneshe ǵımarat. Sonymen qatar Jaıyq qalashyǵyn ıÝNESKO-nyń Dúnıejúzilik mádenı mura tizimine usyný úshin qujattar daıyndalýda.

Osyndaı tamyry tereńge jaıylǵan tarıhı-mádenı oryndardy halyq arasynda keńinen nasıhattap, onyń qundylyǵyn dáripteýdiń bolashaq urpaq úshin mańyzy zor. Óıtkeni týǵan jerge taǵzym osyndaı qasıetti oryndardy qadirlep, qasterleýden bastalady. Aldaǵy ýaqytta «Rýhanı jańǵyrý» baǵdarlamasy aıasynda tarıhı eskertkishter kúrdeli jóndeýden ótkizilip, halyqtyń taǵzym etetin, otandyq jáne sheteldik týrısterdiń jıi keletin, qazaq tarıhynan syr shertetin kıeli oryndarǵa aınalady.

Sondaı-aq baǵdarlama aıasynda sandyq tehnologııalyq múmkindikterdi paıdalana otyryp, Aq Jaıyq óńiriniń elektrondy entsıklopedııasy ázirlenýde.

Batys Qazaqstan tarıhyn ózge óńirlerge, kórshi memleketterge tanytý maqsatynda ekspedıtsııalar jumys isteýde.

Bıylǵy qazan aıynda «Týǵan jerge taǵzym» jobasy aıasynda Aq Jaıyq óńirinen shyqqan, qazirgi tańda respýblıkalyq jáne halyqaralyq deńgeıde elimizdiń damýyna qyzmet etip júrgen azamattardy týǵan jerlerine shaqyryp, halyqpen kezdestirip, óz salalary boıynsha sheberlik sabaqtaryn uıymdastyrý josparlanýda.

Jalpy, oblysta «Rýhanı jańǵyrý» baǵdarlamasyn júzege asyrý úshin arnaıy keshendi jospar daıyndalyp, oǵan ár túrli 20 joba engizilgen. Olardyń qatarynda ashyq aspan astynda mýzeı ashý, kıeli jerlerdegi ınfraqurylymdy damytý, arheologııalyq qazba jumystaryn júrgizý, kóne jádigerlerdi izdeý sııaqty kóptegen ıgi ister bar. Bul jumystardyń barlyǵy aldaǵy alty jylǵa josparlanyp, «Rýhanı qazyna», «Tárbıe jáne bilim», «Aqparat tolqyny», «Atameken» degen arnaıy baǵdarlamalar arqyly júzege asady.

«Rýhanı jańǵyrý» baǵdarlamasy aıasynda jáne Elbasynyń qazaq tilin latyn qarpine kóshirý jónindegi bastamasyn qoldaý maqsatynda «Nur Otan» partııasymen is-sharalardyń respýblıkalyq jelilik kestesi bekitilip, soǵan oraı oblystyń barlyq aýdanynda tıisti jumystar atqarylýda. Josparǵa sáıkes «Bolashaqqa baǵdar: rýhanı jańǵyrý» maqalasyn nasıhattaý baǵytynda halyqpen kezdesýler, eńbek ujymdary men bastaýysh partııa uıymdarynda sharalar ótýde. Mysaly, 19 qyrkúıekte Demokratııalyq kúshterdiń «Qazaqstan - 2050» Batys Qazaqstan oblystyq koalıtsııasy Elbasymyzdyń latyn álipbıine kóshý bastamasyna qoldaý bildirip, óńir turǵyndaryna úndeý jarııalady.

Oblys basshysy Altaı Kólginov bul jumystardyń asa mańyzdylyǵyn atap kórsetip, oǵan partııa músheleriniń belsendi atsalysýy kerektigin jetkizdi.