BQO-da kezeksiz úı bergen bólim basshysyn qyzmetinen bosatý usynyldy
ORAL. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha ádep keńesiniń kezekti otyrysynda bir top memlekettik qyzmetshiniń, sonyń ishinde Bórli jáne Jańaqala aýdandary turǵyn úı komıssııalary tóraǵalary men músheleriniń tártiptik isteri qaraldy, dep habarlaıdy «QazAqparat» tilshisi.
Bórli aýdany prokýratýrasynyń usynysy negizinde aýdan ákiminiń orynbasary Qaırat Ótegenov, aýdandyq ekonomıka jáne qarjy, turǵyn úı-kommýnaldyq sharýashylyq, jolaýshylar kóligi jáne avtomobıl joldary, jumyspen qamtý jáne áleýmettik baǵdarlamalar, turǵyn úı ınspektsııasy bólimderiniń basshylary Gúlnár Shamǵonova, Qýantaı Sháripov, Olga Basımova, Serik Adlıalıev, Altaı Darısovtyń tártiptik isteri talqyǵa tústi. Munda múgedek sportshy Málik Muqashevqa kezeksiz úı berilgeni anyqtaldy. Jańaqala aýdanynda da osyndaı zańbuzýshylyq oryn alyp, burynnan úıi bar ákimdik qyzmetkerine páter berilgen. Soǵan baılanysty Jańaqala aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Nurlan Beıisov qyzmetinen óz erkimen ketkendikten, ádep jónindegi keńestiń aldyna sol bólimniń bas mamany Asylbek Tóleshev, sondaı-aq aýdandyq ekonomıka jáne qarjy, sáýlet, qurylys jáne qala qurylysy bólimderiniń basshylary Janat Basırova, Erlan Ábdirov keldi.
Ádep jónindegi keńes máseleni talqylaı kele, komıssııa hatshysy retinde sheshimdi qabyldaýǵa qatyspaǵan A.Tóleshevke qatysty isti qysqartýdy jón dep tapty. Al Q.Sháripovti qyzmetinen bosatý, qalǵan memlekettik qyzmetshilerdi qyzmetine tolyq sáıkes emestigi týraly eskertý berý túrindegi tártiptik jazaǵa tartý jóninde usynys jasady.
Otyrysta sondaı-aq sybaılas jemqorlyqqa qarsy is-qımyl ulttyq bıýrosy BQO boıynsha departamentiniń usynysy boıynsha oblystyq ádilet departamentiniń basshysy Almat Narqulovtyń tártiptik isi qaraldy. Munda aýdandyq jáne Oral qalasy ádilet basqarmalary tarapynan jiberilgen qylmystyq is-áreketter jónindegi derekterdiń ýákiletti organǵa ýaqtyly jiberilmeýi talqylandy. Ádep jónindegi keńes kópshilik daýyspen bul isti de qysqartty.
